البرتغال بدات كتوجد للمغرب.. ها شنو دار رونالدو والإصابات اللي عندهم (تصاور)

بدا المنتخب البرتغالي كيوجد لربع نهائي كأس العالم قطر 2022، واللي غادي يلعب فيه السبت الجاي ضد المنتخب المغربي من بعدما ربح سويسرا فثمن نهائي البطولة.
ودار المنتخب البرتغالي اليوم الأربعاء، الحصة التدريبية الأولى من بعد ماتش ثمن النهائي اللي ربح فيه البارح منتخب سويسرا بنتيجة 6 لواحد، وقسم مدرب البرتغال فيرناندو سانتوس المنتخب البرتغالي على 2، الرسميين بوحدهم والاحتياطيين بوحدهم أما كرستيانو رونالدو فكان استثناء.
فالبنسبة ل11 لعابا البرتغاليين اللي لعبو رسميين فالماتش ضد سويسرا، دارو تمارين فلاصال إضافة لكرستيانو رونالدو وكان هو الاستثناء، حيث كان احتياطي فالماتش البارح ومدخل حتى الدقيقة 74، أما باقي الاحتياطيين اللي ما لعبوش الماتش تدربو بشكل عادي فالتيران ديال "الشيحانية" مركز تدريب المنتخب البرتغالي.
وبخصوص الإصابات فصفوف منتخب البرتغال، فعندهم 2 لعابا موعتين هما دانيلو بيريرا، ونونو مينديز، ومتبعين العلاج ديالهم مع الطاقم الطبي ديال المنتخب.
وغادي يلعب منتخب البرتغال ضد المنتخب الوطني المغربي يوم السبت الجاي، فربع نهائي كأس العالم قطر 2022، وغادي يتلعب الماتش فتيران الثمامة فالعاصمة القطرية الدوحة، مع 4 ديال لعشية بتوقيت المغرب.