بودريقة والرجاء طلع لهم تبرهيش عمرو وردة فالراس وقررو يصيفطوه بحالو

قررو الرجاء الرياضي يخليو اللاعب المصري عمرو وردة يمشي بحالو، حيث بان لهم انه ما منوش وكيتفلا، وأن اللاعب اللي كانوا كيتسناو يعطي الاضافة للفريق فيه غير المشاكل وماشي محترف واخا عندو 29 عام فعمرو.
وحسب مصدر مطلع فاليوم العشية، عمرو وردة حضر للحصة التدريبية د الرجاء الرياضي على اساس انه يتدرب مع الفريق، ولكن تبين للطاقم التقني والمسؤولين بالنادي، أن اللاعب هارب له الفريخ وكيتفلا وما مركزش نهائيا فالتداريب، وهذا الشي خلاهم يتخذو قرار الانفصال عليه بالتراضي، في انتظار الاعلان الرسمي على القرار، مع العلم ان الفريق تعاقد معه قبل ايام فقط بموجب عقد يمتد لسنة واحدة مع امكانية التجديد، وكلشي كان خايف يدير وردة شي فضيحة جنسية قبل ما يزيد بحالو، لكن هذه المرة سخف بكري وبان ما عندو جهد.
وبين عمرو وردة على الهواية ديالو من نهار حط رجليه فالرجاء وسنا مع الفريق، وكل مرة كتخرج عليه شي إشاعة والبارح حط واحد السطوري فانستغرام وداير فيها سخفان فالسبيطار وخارج كيعطي تصريحات للصحافة المصرية على أساس انه مريض نفسيا وباغي ينفصل على الرجاء، قبل ما يتدخل محمد بودريقة رئيس النادي هو والمكتب ديالو وينافقو معه على الاستمرار ولكن الحصة التدريبية ديال اليوم بان من خلالها ان اللاعب ما منوش.