دابا هذا محترف تعول عليه؟ الكابوني أكسيل مايي لاعب الرجاء قلبها تورنوا فالزنقة وقرار صارم كيتسناه من بودريقة

خالق الكابوني أكسيل مايي مشكل كبير ثاني وسط الرجاء الرياضي، بقلة الاحترافية ديالو وسوء الانضباط، وهذا الشي بالاضافة إلى التكلفة الكبيرة باش مقيوم على النادي دون ما يليق مستواه بالنيفو د الرجاء.
اللاعب الكابوني اللي المستوى ديالو ما بقاش يقدر يسمح له يلعب مع الرجاء الرياضي الفريق اللي كيقلب على الالقاب، ناض قلبها تورنوة ديال الزنقة، ولعب فتيرانات الاحياء فمنطقة الولفة بكازا دوري هواة بين الافارقة جنوب الصحراء ، فخطوة غريبة من لاعب كان من المفروض عليه انه يركز كثر فالتداريب باش يرجع ولو غير شوية من النيفو ديالو، خصوصا وان المدرب د الرجاء جوزيف زينباور ما اقتنعش بمستواه طلب الابعاد ديالو من الفريق والتعاقد مع مهاجم بامكانيات افضل.
ومن المنتظر يتخذ الرجاء الرياضي برئاسة محمد بودريقة قرار انضباطي حازم في حق اللاعب أكسيل مايي بسبب السلوك ديالو الطائش، مع العلم ان اللاعب مكلف الفريق ملي جا كان تعاقد معه الرئيس السابق عزيز البدراوي وجابر من اتحاد طنجة، الزبابل ديال لفلوس ومستواه ضعيف وما قدرش يدير بلاصتو والتكلفة ديالو كبيرة بالمقارنة مع شنو عطى للفريق.