كلشي تحرق الا هي.. دار فهاواي دايرة البوز

دكشي بحال الافلام، الغابة لي كينا فمدينة لاهاينا الأمريكية فهاواي، كلها تحرقات ملي شعلات فيها لعافية وبزاف ديال الناس ماتو، وشحال من دار مشات فيها، إلا واحد الدار حمرة موقع ليها والو، والناس مافهمو والو.
صحيفة نيويورك بوست الأمريكية نشرات حتى هيا تصويرة ديال هاد دار لي تبارطاجات بزاف فالسوشل ميديا، وكلشي كيسول فالكومونطيرات على السر لي خلا هاد الدار لي كينا فقطعة ديال أرض كطل على المحيط غربي جزيرة ماوي فهاواي، مايوقع ليها والو.
باتي تامورا مولات دار قالت أن دارها ورتاتها من جدها لي بناها فالخمسينات، ودار ليها الحيوطا غلاض وبناهم بالسيمة حيت كانو الحشرات والعفن الجاف بزاف فهاواي ديك الساعة، وهادشي لي خلاها ماتحرقش بحال ديور لآخرين.