حركاس قج الرجاء وحط مكتب بودريقة فموقف صعيب

صدم لاعب الرجاء الرياضي جمال حركاس مكونات النادي، وناض كيطالب بمستحقاتو اللي كيتسالها منذ مدة، واخا اتفقو معه باش ياخذهم شويا بشويا، بحال كاع اللاعبين اللي مازالين كيتسالو.
وحسب مصادر مطلعة، فجمال حركاس مدافع الرجاء الرياضي علم المكتب المديري للنادي، أنه باغي المستحقات ديالو اللي كيتسالها عامين هادي، أو انه غيريزيلي الكونطرا مع الفريق من جهتو هو ويمشي بحالو.
وكيتسال جمال حركاس تقريبا 180 مليون سنتيم مجموعة فيها بريمات ديال عامين هادي، مع العلم انه توصل بعد صعود الرئيس الحالي محمد بودريقة بمبلغ مهم من داكشي اللي كيتسال كيوصل لتقريبا 50 مليون.
وحط جمال حركاس ادارة الرجاء الرياضي فموقف صعيب بزاف، حيث الوضع المالي ديال النادي صعيب والمكتب المديري مضارب مع رفع المنع والتعاقد مع لاعبين جداد وصرف المستحقات العالقة، والمشكل هو ان اللاعب الا ريزيلا الكونطرا فالفريق هو الخاسر حيث غيمشي فابور وغياخذ فلوسو من النزاعات والاكثر من هذا الشي هو ان الرجاء غيخصهم يقلبو على مدافع جديد قبل بداية الموسم اللي ما بقى له والو.