عبر محمد بن مالك محامي محمد الحيداوي البرلماني ورئيس أولمبيك آسفي اللي تحكم عليه يوم الجمعة 11 غشت 2023، بالحبس فقضية التلاعب بتذاكر مونديال قطر، عن عدم رضاه بالحكم اللي صدر فحق الموكل ديالو، وأكد أنه ما داير والو، وخاص المحكمة تعطي التعليل علاش حكمت عليه، وشدد على أنه مشدود فالحبس ظلما وعدوانا. وتحدث المحامي محمد بن مالك بعد صدور الحكم على الموكل ديالو محمد الحيداوي وصحافي راديو مارس عادل العماري اللي عطاوه حتى هو 10 أشهر نافذة فقضية التلاعب بتذاكر مونديال قطر، وقال: "ما كنتش كنتخيل أنه غتكون إدانة لأن المرافعة ديالي كانت منصبة على أنها تبين انعدام العناصر التكوينية للعناصر المتابع من أجلها محمد الحيداوي، داكشي علاش ما كنتش كنتوقع تكون الإدانة بقى غير نلتامس ظروف التخفيف، حيث بالنسبة ليا كان مستبعد جدا أن المحكمة تحكم بالإدانة كيفما كان مستبعد أن الحيداوي يكون ارتكب شي فعل اللي فالحقيقة لا وجود له، وما كاينش فالملف أن الحيداوي ارتكب جريمة محاولة النصب". وبخصوص الخطوة المقبلة ما بعد صدور الحكم، قال محامي الحيداوي: "غنتسناو نشوفو التعليل اللي اعتماداتو المحكمة فالحكم، ونتمى أن التعليل يشفي الغليل ديالنا ونعرفو أنها كان عندها تعليل، وبالنسبة للاستئناف غنشوفو مع محمد الحيداوي، حيث هو اللي خاص يقرر بعدما نعرضو عليه الحكم ونقولو له الرأي ديالنا وديك الساعة هو عندو كامل الصلاحية سوا أنه يستانفو أو ما يستانفوش". وكمل محمد بن مالك وقال: "واخا كون كان حكم غير ديال شهر كان غيصدمني لأن الإدانة كلها كتصدمني حيث هذا ملف ما فيهش الإدانة، والموقف ديال ثابت محمد الحيداوي ما دارش شي حاجة يمشي عليها الحبس، وهو دابا فالحبس ظلما وعدوانا وهادي قناعتي، راه الحيداوي ما دار والو.. أش دار؟.. ولكن دابا كاين حكم وكنحترمو الأحكام، وغنشوفو الحكم كيف داير ونحددو الموقف ديالنا منو حيث الحكم خاصو يكون معلل لأن التعليل ديال الأحكام نص عليه دستور المملكة المغربية، راه ما يمكنش لك إدانة واحد الإنسان بحكم غير معلل، وما بقاش دابا كيجي شي واحد وتصيفطو الحبس غير هاكاك، إلى بغيتي تصيفطو الحبس خاصك تصيفطو بالقاعدة وتعطيه علاش وأنا كنتسنا نشوف علاش مشى الحيداوي الحبس وبالنسبة ليا ما دارش شي حاجة اللي تخليه يمشي الحبس كنتسنا إلى شفت الحكم ربما نعرف علاش".
