لعب الدراري.. المركز الجهوي للاستثمار بالعيون حذف البلاغ الصحفي الخاص باستثمار صيني بقيمة 200 مليار درهم وعطى فرصة لخصوم الوطن يركبو عليه

قبل ساعات نشرنا مقال فموقع "كود" ينتقد البلاغ الركيك والصور الهاوية اللي دار المركز الجهوي للاسثمار، بخصوص استثمار شركة صينية متخصصة في صناعة البطاريات بقيمة إجمالية تصل إلى 200 مليار درهم مع توفير 13 ألف منصب شغل.
انتقادنا لم يأتي من فراغ وإنما بناءا على معطيات ومعلومات وتعاطي مباشر مع مسؤولي هذا المركز الجهوي للاستثمار، واللي كيفتاقدو لحس المسؤولية والجدية، وكيعتاقدو أن المركز ملك ديالهم، خصوصا المدير اللي مجبد فمكتب مكيف و مدور بيه الدراري اللي خاصهم محو الأمية فالتواصل والتعامل مع الصحافة، لأن التخصص ديالهم هو التطبيل والمكياج .
واللي توقعناه وقع، دابا هادي ساعة تسحب البلاغ وتم حذفو دون أي توضيح أو شرح أو اعتذار بعد أن نشر فعدد من الجرائد والمواقع.
بعض المقربين هضرو على غضبة كبيرة على المدير العام للمركز والطاقم ديالو اللي استغلو غياب والي الجهة اللي عندو كونجي، وداهم الجهد بنشر خبر زائف بتحويل اجتماع أولي استكشافي لاستثمار حقيقي معروف بشحال وشحال غادي يخدم .
يعني باعو الوهم وزرفو كلشي وعطاو كادو لخصوم الوحدة الترابية، وهاذي الشي هو اللي خلى التدخل يجي من الفوق ولكلام على تعليمات صارمة من محسن الجزولي الوزير المنتدب لدى رئيس الحكومة المكلف بالاستثمار والالتقائية وتقييم السياسات العمومية بفتح تحقيق ومعاقبة جميع المسؤولين عن صياغة ونشر بلاغ زائف ومضلل ويحمل معطيات مغلوطة .