بعد حل مشكل المنع.. الرجاء كيتسناو اللاعبين الجداد يتكونفوكاو لماتش كريستيانو وصحابو

كيتسناو الرجاء الرياضي تأهيل اللاعبين الجداد باش يقدرو يستافدو من خدماتهم فربع نهائي كأس العرب ضد النصر السعودي.
وبعدما نجحت إدارة الرجاء الرياضي فأنها تحل مشكل أحكام النزاعات اللي على النادي وخلصتها، بدات بإجراءات تأهيل اللاعبين الجداد اللي سنا معهم الفريق خلال هذا الميركاتو، ودابا كتسناهم يتكونفوكاو باش يلعبو الماتش الجاي للخضرا ضد النصر السعودي فربع نهائي كأس العرب.
وغيلعب الرجاء الرياضي ضد النصر السعودي بقيادة الأسطورة البرتغالية كرستيانو رونالدو والنجم السنغالي ساديو ماني، فربع نهائي كأس العرب ومن المنتظر يكون الماتش قاصح بزاف، مع العلم أن الرجاء الرياضي هو الفريق الوحيد اللي باقي من إفريقيا فكأس العرب، بعد إقصاء كل الفرق الإفريقية من الدور الأول.