مدرب اللبؤات: ها اللي وقع ف48 ساعة وبدل عقلية اللعابات بعد الخسارة ضد لالمان وخلانا نربحو اليوم

قال مدرب اللبؤات بيدروس رينارد باللي المنتخب اللي ربح اليوم كوريا الجنوبية وهدى المغرب اول فوز فاول مشاركة ليه فمونديال لعيالات هو المنتخب اللي لعب مع المانيا هادي اسبوع وخسر ب6 لزيرو.
المدرب قال باللي "حافظنا على نظام اللعب اي هوية المنتخب وغيرنا فقط بعض اللعابات فاشارة الى تغيير فقلب الدفاع بدخول نبزينة فبلاصة لمرابط ومهاجمة الجيش الجرايدي فبلاصة مهاجمة توتنهام روزيلا.
بخصوص سؤال ل"كود" علي 48 ساعة القاصحة اللي دوزها المنتخب بعد ماتش المانيا وكيفية التغلب عليها قال "كانت 48 ساعة صعيبة. بعدها تغيرات العقلية. بدات الفرقة كتخدم. رجعنا للي كنا فيه. فهاد الاجواء وجدنا ماتش كوريا الجنوبية"
المدرب شدد على ان التحول وقع حقاش عقلية اللبؤات "زوينة"
المدرب اكد باللي حتى فالخسارة مع المانيا كان جانب ايجابي وباللي هادا هو اللي خدمناه بزاف٬ اي خدمو هو والفريق اللي معاه. بخصوص اش قال اللعابات٬ رد بيدروس "قلت ليهم خاصنا ندوزو لمرحلة اخرى"
المدرب اكد باللي بعد 3 ايام كاين ماتش اخير للمنتخب ضد كولومبيا وباللي الهدف ديال اللعابات نربحو 3 نقاط جديدة ونضمنو التأهل لثمن النهاية.
المدرب بدا متفائلا حتى باللعابات اللي معاه "عندنا لعابات جاهزات يدخلو للماتشات. اليوم وقعات تغييرات والعقلية ونظام اللعب بقى هو هو.