التوجه ضد الفرانساوية غادي ويكبر.. مغاربة احتجو على عرض فيلم "أوبنهايمر" وسط ميكَاراما – فيديو

المغاربة نوضوها ديال بصح البارح الخميس وسط سينما ميغاراما في كازا بعدما شراو تيكي ديال فيلم Oppenheimer باش يتفرجو في النسخة الأصلية باللونكَلي ولكن ملي دخلو دارو ليهم الفيلم لقاو النسخة الفرانساوية وهي تنوض الروينة.
المغاربة بداو كيغوتو واحتجو وبداو كيقولو "رجعو لينا فلوسنا"، ناس ميكَاراما تلفو وحبسو الفيلم وداروه للمرة الثانية وكانت حتى هي بالفرانساوية، قبل ما يداركو الأمر والثالثة كانت ثابتة بلونكَلي.
هاد القضية كتبين التوجه ضد الفرانساوية لي غادي وكيكبر، والإقبال على لونكَلي لي غادي يتم الاعتماد عليها من السنة الأولى للتعليم الإعدادي ابتداء من العام الجاي.
وتجدر الإشارة أن تعمميم لونكَلي في المغرب غادي يشمل في الأول 10% فقط من تلاميذ السنة الأولى و50% من تلاميذ السنة الثانية الموسم المقبل، على أن يغطي 100% من التلاميذ موسم 2025-2026.
وهاد اليوماين بدا العرض ديال فيلم أوبنهايمر Oppenheimer في العالم، من بينها القاعات السينمائية المغربية، وهو فيلم من إخراج البريطاني كرستوفر نولان، كيعاود قصة حياة أب القنبلة النووية ومدير مشروع مانهاتن النووي الأميركي (البريطاني الكندي الفرنسي) روبرت أوبنهايمر.
https://web.facebook.com/watch/?v=235462908834438&extid=CL-UNK-UNK-UNK-IOS_GK0T-GK1C&mibextid=2Rb1fB&ref=sharing&_rdc=1&_rdr