الناصيري عندو موعد مع لاعبين الوداد وداير لهم حوافز مالية باش يتقاتلو على البطولة

كيدير سعيد الناصيري رئيس الوداد الرياضي مجهودات باش يخلي الفريق مركز على الفوز بلقب البطولة الاحترافية لكرة القدم، ويربح جميع الماتشات اللي باقيين عندو، ويخرج من أجواء خسارة عصبة أبطال إفريقيا بسرعة.
ومن المنتظر يبرك سعيد الناصيري مع لاعبين الوداد الرياضي قبل الماتش ديالو غدا مع اولمبيك آسفي، باش يحفزهم ويشجعهم يحققو نتائج إيجابية فهذا الماتش والمبارتين اللي مازالين د البطولة من وراه، وغيخصص لهم حتى حوافز مالية باش يربحوهم بثلاثة.
وغيلعب الوداد الرياضي غدا السبت فستاد دور أمام اولمبيك آسفي برسم الدورة 28، والفريق ما بقاش عندو هامش د الخطأ فالمنافسة على لقب البطولة بعدما تعادل الماتش اللي فات، ودابا مطالب يربح كل الماتشات ويتسنى هفوة من ليفار باش يربح البطولة.
وكيطمح المكتب المديري للوداد الرياضي برئاسة سعيد الناصيري إلى تحفيز اللاعبين باش يبقاو مركزين ويتجاوز الفريق صدمة خسارة عصبة أبطال إفريقيا الأحد الماضي، ويشجع اللاعبين أنهم يتقاتلو على لقب البطولة الإحترافية، وبعدها يربحو كأس العرش اللي غيلعبو فالدومي فينال ديالو مع الرجاء الرياضي.