أكد فوزي لقجع، الوزير المكلف بالميزانية، أنه سيتم صرف التعويضات العائلية للأسر الفقيرة هذه السنة، مشيرا بأن هذا توجيه ملكي غاتنفذو الحكومة. وأوضح لقجع، خلال لقاء لجنة المالية بمجلس النواب، أنه يجب الاعتراف بصعوبات تنزيل الحماية الاجتماعية ونحطوها فوق الطاولة ونعالجوها.. ووعد لقجع بحل بعض المشاكل المتعلقة بتحويل صحاب راميد إلى نظام التأمين الصحي الاجباري AMO، مشيرا بلي الناس لي مستفدوش او لقاو صعوبات غادي نلقاو ليهم حلول، نفس الشيء بالنسبة للسجل الفلاحي. وشدد لقجع بلي يلا كانو بعض الالاف مستفدوش ومتحولوش من راميد لنظام التأمين الاجباري، راه مسجلين الملايين، مؤكدا بلي غايصلحو كاع هاد المشاكل تدريجيا. وطالب لقجع بفتح الباب أمام المتضررين من التغطية الصحية والاستماع لشكاياتهم، ولكن "ماشي باسم الصعوبات يجيو الناس لي عندهم امكانيات وكيخسرو فلوس كثيرة فنفقات من الكماليات ويبغيو يستفدو" وفق تعبير لقجع. وتابع المتحدث :"هاد الناس لي كتلقا عندهم اشتراكات متعددة فشركات الاتصالات ويبغيو يستفدو حيث القضية متعلقة بالصحة". وتابع لقجع :"كنخلصو 9.5 مليار درهم على صحاب الراميد سنويا، مقسمين على اربعة اقساط فالعام، باش ناس لي مفحالهم يستفدو من التغطية الصحية الاجبارية بنفس المعايير والظروف لي كيستفدو منها باقي الفئات".
