مدرب جديد لحكيم زياش.. تشيلسي جابو الأرجنتيني بوكيتينو بلاصة لامبارد

كشفت تقارير إعلامية أوروبية اليوم الأحد أن تشيلسي الإنجليزي اللي كيلعب له الدولي المغربي حكيم زياش، غيولي عندو مدرب جديد باش يشرف عليه بلاصة فرانك لامبارد المؤقت اللي دايرين معه حتى يسالي هذا الموسم.
وحسب الإعلام الإيطالي فابريسيو رومانو المتخصص في صفقات انتقال اللاعبين والمدربين بأوروبا، فالمدرب الجديد لتشيلسي الإنجليزي هو الأرجنتيني ماوريسيو بوكيتينيو، وراه سناو العقد اللي غيكون ساري المفعول حتى لشهر يونيو 2026، وهذا الشي فانتظار الإعلان على الصفقة.
ومن جهة أخرى، كيعاني الدولي المغربي حكيم زياش بزاف مع تشيلسي منذ مدة، بسبب التغييرات الكثيرة ديال المدربين اللي أغلبهم ما عطاهش فرصة باش يبين المهارات ديالو باستثناء المرحلة الأولى ديال فرانك لامبارد قبل ما يمشي ويعاود يرجع، والنجم المغربي كان غادي لباريس سان جيرمان فالميركاتو الشتوي الماضي ولكن فشلت الصفقة بسبب أخطاء بدائية من إدارة تشيلسي وكاين تقارير كتقول أن المسؤولين د الفريق الإنجليزي هم اللي ما نعين المدربين يلعبو النجم المغربي حيث سافر لباريس فشهر يناير الماضي بوحدو باش يسني مع PSG قبل ما تفشل الصفقة.