حكيمي دوز العيد مع الأيتام وفرح أطفال وضعيتهم صعبة عكس مشاهير عاطينها للحلوة والسطوريات (فيديو)

عكس بزاف ديال النجوم والمشاهير اللي كيتبهاو بالأنشطة ديالهم الخاوية فعيد الفطر وينشرو صورها على مواقع التواصل الاجتماعي، كان الدولي المغربي أشرف حكيمي على موعد مع نشاط هادف وفيه بزاف ديال الإنسانية، حيث اختار يعيد مع الأطفال الأيتام فهاد المناسبة الاجتماعية ويدخل الفرحة على قلوبهم.
الدولي المغربي أشرف حكيمي اللي كيتعتبر واحد من مشاهير العالم، قام بزيارة نهار العيد لجمعية باب ريان بكازا وهي جمعية خاصة بحماية الطفولة واحتفل مع هاد الأطفال بالعيد ودخل عليهم الفرحة، وكان حكيمي، حسب الجمعية، مصدر إلهام بالنسبة لهم وشجعهم باش يوصلوا أحلامهم وشغفهم.
الجمعية أكدات أن زيارة أشرف حكيمي هي شهادة بأن النجم المغربي عندو التزام تجاه المجتمع وكرم تجاه الأطفال الأكثر حاجة، وشكراتو على هاد المبادرة وعلى الدعم ديالو.