يَا سَلاَمْ يَا سَلاَمْ

قصيدة زجلية للشاعر الزجال ميراني الناجي تحت عنوان "يَا سَلاَمْ يَا سَلاَمْ"

يَا سَلاَمْ يَا سَلاَمْ

يَا سَلاَمْ يَا سَلاَمْ
فين مْشَاتْ ايَامْ ايَامْ
فين عويطة ونوال
ولكروج وبولامي
فين هما دوك الْأبطالْ ؟
هزو بينا لَعْلامْ
شَهْرونا فْ لْعَالَمْ
زادو بينا لْقدامْ
يا سلام يا سلام
تلينا بْحَالْ لْفَكْرونْ
فْ جامعةْ الْحَلزونْ
» دَب الْحلزونْ
فَوْقَ حجارة
من أين أتى ؟ «
يا سلام يا سلام
كل شي مْشَى فْ لْخَروبي
ولينا لَوْلينْ فْ لْقَرقوبي
هذا مَغْربْ لْعَجائبْ
وَزعْتو لْمَنَاصبْ
عَلْ لَحْوَالاَ وْلَمْعَاطبْ
وْهَمشْتو التجاربْ
وَالْإطار لْمناسبْ
يا سلام يا سلام
واش الْمَغْرب هو هذا ؟
لا كورة لا رياضة
لَفْلوس مْشَاتْ فْ لْوَلائمْ
وْزَدْتوها بالْهزائمْ
خْسَرْتو شْحَالْ دْيَالْ لَفْلوسْ
لاَ بودْيومْ وَلاَ كؤوسْ
يا سلام يا سلام
فين ايام الْعَز مْشَاتْ
والرياضة عندنا فَشْلاَتْ
وَرْجَعْ مَغْربْنَا فْ لْحينْ
مَنْ لندن يبكي وَيْنينَ
كَالو ليه سيرْ ضيمْ
وْهَز قْلوعك يا مَسْكينْ
يا سلام يا سلام
مَهْزَلَةْ هَاذْ لْكونْ