إستجواب "إفتراضي " للوزراء المرشحين للرحيل الفوري إستقراء لتنبؤات " جون أفريك "

لازال المغاربة والمتتبعون للشأن الحكومي من داخل المغرب وخارجه ، ينتظرون ماستؤول إليه الأوضاع _ إن لم نقل يمنون النفس _ برحيل غالبية أعضاء الحكومة بدء برئيسها ، ليس بالضروري لكون الأنباء الإعلامية التي راجت بقوة مؤخرا عقب قصاصة لمجلة " جون أفريك " الفرنسية هي السبب ، ولكن لما آلت إليه الأوضاع الإجتماعية والإقتصادية وحتى السياسية ببلادنا ، وغياب أي تحرك حكومي ملموس اتجاه الغلاء الفاحش للأسعار ، بل حتى على مستوى السلطات المحلية التي لم تحرك لجان مراقبة الأسعار تحريكا يوازي ما قامت به إبان الإحترازات المتعلقة بجائحة كوفيد ، عندما كان المغاربة يطالعون عبر شاشات التلفاز ، وداخل أحيائهم عناصر السلطة من قياد وباشوات بزي عسكري ، برفقتهم أعوانهم وهم يجوبون الشوارع طولا وعرضا ، ملزمينهم باحترام الطوارئ وإرغامهم على إقفال محلاتهم التجارية والدخول للمنازل في أوقات معينة ، لكن لماذا إختفت هذه العمليات مع إرتفاع الأسعار التي إغتنمها تجار التقسيط للتلاعب بجيوب المواطنين ، لماذا اختفت أمام وضع يقتضي ان يحس فيه المغربي أن أمنه الغذائي والصحي والمالي في مأمن ؟؟
لهذا السبب ، إرتئينا أن نجري حوارا _ إفتراضيا _ رغم الصعوبات التي واجهتنا مع غالبية الوزراء سيما الذين تعرضت أسماؤهم لترسانة من إنتقادات المغاربة مطالبة برحيلهم الفوري ، لضعف تدبيرهم وآدائهم من جهة ، ولتكريسهم للفقر والتهميش الذي طال فئات واسعة من معيشة المغاربة.
صادفنا السيد عزيز أخنوش وعلامات السعادة بادية على محياه بعد خروجه من أحد الإجتماعات
_ كاب 24: السيد الرئيس بغينا ناخذو رأيك بخصوص إرتفاع منسوب المطالبة برحيلك والهاشتاغ لي فات تلاتة ملايين وارتفاع أسعار المحروقات وانخفاض مهول ديال قوة الإستهلاك لدى المواطنين ؟ وملي بدات الإنخفاضات الضئيلة سبقتي شركة ديالك إفريقيا وخليتي باقي الشركاء كايغوتو هدشي راه عطات ريحتو,, علاش طردوك ساكنة أكادير لي هو المعقل ديالك من حفل تيمتار تزامنا مع إحتراق الالاف من الهكتارات ونت يالله طالعتي على إفتتاح مشروع التيلي فريك ديال 80 درهم الواحد بدون مناظر تجلب الزوار ، فقط التضاريس والناقلات تجوب أسفل العربة
_أخنوش :شوف أنا مزروب دبا بزاف عندي اجتماع ديال الحزب ، حاول تاخد موعد ودوز لعندي المكتب
_ كاب 24: حاولنا مرارا لكن الجواب ديال السكرتيرة أن الأجندا ديالكم عامرا بزاف ، عطينا رأيك غير باختصار _ سي عزيز دخل السيارة ديالو كيهضر من النافذة _
_أخنوش : أنا الصراحة سبق ليا هضرت على الصعوبات السياسية لي كتواجه المقاول إلى زغبو الله ودخل ليها وهدشي هو لي كنعيشو دبا ، وسبق ليا وضحت في ندوة مع جمعية الفقيه التطواني ، ردا عن سؤال أني لا أملك لا فيرمات ولاعقارات فحال لي كيروجو شي بعضين ، نعم أنا مسير فقط ،وكنأكد ليك بلي راني نادم ، أما الهاشتاغ ديال إرحل راه غير مخدوم مامنو والو يالله فيه شي عشرة ولا عشرين لي تجرو مع اللعبة ، وراني فايت ليا حلفت بلي وخا تجتامع الكتائب الإلكترونية ديال الدنيا والدين والله مايصورو مني شي حاجة ، _ يهم سائق السيارة بالإقلاع _
كاب 24 : إلا سمحتي ليا السيد الرئيس ، كنشكرك على التجاوب لكن باقي مجوبتي على الأهم
أخنوش : إيوا متعيقش خليني نزيد لشغالاتي راني عارفك علاياش كتقلب _ مع إبتسامة جد خفيفة_
كاب 24: واش مجيئك للأحرار كان سليم ؟ علاش مخلتيش سي أوجار يتقلد منصب الأمانة العامة للحزب ،بحكم أنه رجل توازنات و له كاريزما لائقة فضلا عن الأقدمية والمؤهلات السياسية _ ماشي المالية _ باش يدبر الشأن أحسن تدبير يعني حسن منك بكثير ،وضحيتي بيه من وزارة العدل التي عرفت في عهده إزدهارا تدبيريا ممتازا ماشي فحال المستوى المخجل لي وصلات ليه دبا ، ونت تفرغ للبجنس ديالك ، ماشي تولي خصم وحكم في نفس الوقت ، وتسير الجو والبر والبحر ، وفالاخير توحل وتوحل شعب برمته معاك و تهتم نت وعائلتك بجمع المال ، بطبيعة الحال ؟واش ماكيبانش ليك أنك وليتي كدير لي قاليك راسك ؟ واش نقدرو نسميو هدشي تفرعين ؟ واش ملي فطر عندك الملك تزادتك شي صلاحيات ؟ أيوا راه هدشي علاش المغاربة مابقاوش بغاوك لانت لا حكومتك وزادت صحافة فرنسا أكدات الأمر ؟
_أخنوش: هدشي ماشي صحافة ,, الله يهنيك _ أقلعت السيارة بسرعة جنونية تاركة غبارا أسود ممزوجا بدخان أبيض، كما إمتزجت الوعود الإنتخابية بالواقع المر ,
إنتقلنا إلى مقر وزارة العدل لمقابلة السيد وهبي ، أو لأخذ موعد ، لم نفلح لا في الاستقبال ولا أخذ الموعد ، عرجنا على مقر مجلس النواب القريب من الوزارة ، وانتظرنا خروجه ساعات طوال .
_كاب 24 :سي وهبي الله يخليك عندنا أسئلة جد بسيطة سريعة ، آش هاد الغضبة الشعبية عليك وعلى تدبير البام ؟ واش كاين شي توتر بينك وبين أخنوش؟ علاش البام عبر على ضعفو في التدبير ماشي نفس الحماس الذي أبداه على الأوراق فقط أثناء الحملة الإنتخابية وبان الفرق كبير بينك وبين إلياس العماري وبنشماس ؟
_وهبي :مكتهمنيش غضبة الشعب كثر من غضبة الملك هدي أولا ، ثانيا وريني بطاقتك بعدا واش نت صحفي مهني ، راني ديما أصر على المهنية والقانون في تدبير الأمور وقلتها في ندوة صحفية باسم الحزب أنه خاص إعادة النظر في الجسم الصحفي ، وعارف بلي راني تدخلت في شؤون زميلي بنسعيد وهو مايقدرش يتدخل فشؤوني لأنها صعيبة ولها ارتباطات بعدة أجهزة تشتغل تحت إمرتي ، وسبق ليا درت نفس السنطيحة ملي كنت معه فتارودانت ، وقصة لون التقاشر ، _ واستطرد ضاحكا _ إيوا كيف جيتك ؟
كاب 24:_ بعد الإدلاء بالبطاقة _ هاهي البطاقة سي وهبي ، واش تقدر تقول لينا علاش تغيرات مواقفك تغييرا خطيرا كان السبب فيما يحدث من بداية الإنشقاق داخل حزبك ؟ ياك قسمتي بلي مادخلش للحكومة لي فيها أخنوش؟ ياك كنتي كترافع على معتقلي الريف من أجل رفع ملتمس للملك من أجل العفو ؟ أش هداك الكتاب الفضيحة لي باقا تداعيات الإخلالات ديالو تابعاك فكتاب بعنوان " الجريمة السياسية وحماية الطفل "، آش داك المصيبة لي ورطتي فيها رئاسة النيابة العامة والمجلس الأعلى للسلطة القضائية ملي وقعوا معاك بلاغ عدم السماح للمحامين دخول المحاكم الا ما لقحوش ؟ علاه نت مادرتيش جرائم سياسية ، بدء بأوديو مسجل مع الراحل عبد الوهاب بلفقيه كتواعدو بحمايته بخصوص ملفات جرائم الأموال والتزوير ؟ ، وسحب مقترح قانون الإثراء المشروع ، وسد الباب أمام الجمعيات التي تعنى برصد المال العام ، واللعب المكشوف البئيس في العلاقة مع العدالة والتنمية وزعيمها بنكيران ، لتصبح عدواة وتبادل القذائف ونعته بالمسؤول عما يعيشه المغاربة الآن من ويلات ,, أليس هذا إعتراف ضمني من طرفكم أن المغاربة اليوم في ضائقة من أمرهم ؟ هل كحكومة جيتو تلقاو لينا حلول ولا تشكاو علينا ؟ وفراس الشهر تمشيو للخزينة تاخذو الملايين من فلوس الشعب ؟ واش ماخاصكومش تغبرو كمارتكم علينا وتخليو لي باغي يخدم بنزاهة مع الملك وشعبو ؟
_وهبي :راك جامع عليا حصيصا من الإنتقادات لي بانت ليك نت أنها إختلالات ,, إيوا الشريف هدشي كلو عندك غير هضرة خاوية ، أنا راه غير أعضاء الحزب لي بززو عليا ندخل الحكومة ,, الحكومة كنت مشهيها ملي كان فيها زميلي مصطفى الرميد ,, ونزيدك عارف راسي غادي نرحل اما دبا إما غدا ,, لكن حتى نحاصر ونجمد جميع المشاريع لي هي في صالح المغاربة … وغادي يبقى يدكروني الشلاهبية بالخير ، راه عادي عندي إلا طلقت الوزارة او هي طلقاتني مولف أنا بالطلاق سول ناس فاس عليا ,,,, يالله تلاح .
إضطرت كاب 24 إستكمال التواصل هذه المرة هاتفيا نظرا لصعوبة الظفر باللقاءات المباشرة مع المسؤولين الحكوميين ، بدعوى أن لديهم مشاغل ، أو أن هناك مسؤول التواصل بإمكانه الإجابة عن تساؤلاتنا .
_كاب 24: آلو سي عبد اللطيف الميراوي ,,معاك كاب 24 ، بغينا غير شي أجوبة قصيرة على أسئلتنا الله يخليك، راه السيدة المكلفة بالتواصل عندك باقا مافهماش معنى الإتصال والتواصل
_الميراوي : تفضل ولكن بسرعة راه عندي شي جلسة مغلقة مع العدل والإحسان
_كاب 24:واش التعليم العالي في عهدك بصحة جيدة ؟ آش هاد الجلسات لي قلتي عليها بلي خاصة مع العدل والإحسان واش هما فنفس الوقت عندهم ارتباط بجامعة محمد الخامس فالرباط ؟ ياكما عينيك على الرئيس ديالها لي قربات ولايتو تنتاهي ؟ علاش وقفات المبادرات والمشاريع السابقة سيما القانون 51/17المتعلق بمنظومة التربية والتكوين والبحث العلمي ؟ لماذا توقيف العمل بنظام الباشلور واش زعما لي ناقشوه وحفاو دماغهم قبل منك ما فيديهمش ؟ واش باغي ترمي مصير 24 ألف طالب للمجهول ؟ علاش تعليق 34 مؤسسة للتعليم العالي ، فاين يمشيو الطلبة للمقابر ؟ آش كتجيك هاديك لي كلفتيها بالمخطط الوطني لتثقيل عفوا لتسريع تحول منظومة التعليم العالي والبحث العلمي ؟ …أش داك التصريح المتعلق بإنقراض مهنة الصيدلي واش نت جاي من شي كوكب آخور ؟. المهم جاوبنا على هدشي بيدمان نعطيوك اسئلة أخرى
_ الميراوي : شوف بكل سرعة على هاد الأسئلة المركبة و المستفزة جدا ، وغالبا عطاوها ليك ماشي ديالك ، ,, أنا أفكاري نابعة من بيئة الفقيه بنصالح وعندي الدكتوراه فالعلوم الهندسية في فرنسا يعني نقدر نهندس كلشي ، ونقلب التصاميم لي موجودا بتصاميم مغايرة سواء التعليم او الصحة او الرياضة وحى الفلاحة أو اي حاجة لي طيح على بالك ، زائد أني خبير دولي في قضايا التعليم العالي والبحث العلمي ، هدشي كامل عطاني قوة باش نبين حنة يدي ، أما فيما يخص محاولاتي تنحية بعض الوجوه رئاسة عدد من الجامعات وتعويضها بآخرين من زملائي لي أنا غادي لعندهم الإجتماع ماكانشوفش كاين شي ضرر أو شي مانع قانوني يمنعني من مزاولة مهامي كوزير ، ونعزل أطر من العدل والإحسان أو من تيار إبليس معنديش المشكل ، ويلا معجبهمش الحال غادي نخلي ليهم التعليم كيفما هو ,,,,, طوط طوط طوط ,,, يغلق السيد الوزير هاتفه .
ننتقل مباشرة نحو وزيرة التضامن ، والادماج الاجتماعي والاسرة السيدة عواطف حيار ، حيث أنها فعلا حيرت حزبها ووزارتها بهزالة التسيير وعدم وصولها كمسؤولة أولى الى الإرتقاء المنتظر ، سيما أنها تغنت غير ما مرة بتنزيل النموذج التنموي الجديد الذي للأسف أفل نجمه، تسالنا معها هاتفيا كالتالي :
كاب 24: السيدة الوزيرة المحترمة ، كيف هي أحوال زوجك مدير ديوانك ، وأحوال التعاون والتنمية الإجتماعية والشؤون العامة ، وهل خمدت إنتقادات حزبك الإستقلال لي نزلتي عليه" بلباراشيت " قبل إنتقادات موظفيك والمتتبعين لك، بل لم يسلم حتى الرجل المتواضع سي نزار بركة من إختلالاتك هذه ، وشنو السر في حملة الإعفاءات ملي دخلتي ونتيا بالسلامة كتطيري فعباد الله خصوصا الأطر المنتجة ، واش لي بغا يبين حنة يديه يبدا يتعدا على الموظفين باش يجيب فريق غير منتج مقارنة بلي تم إعفاؤهم نزولا عند رغبة صقور الإستقلال الهاتفية ؟
_ عواطف حيار: شكرا للجرأة الكبيرة لي تكلمتو بيها ونا مستاعدة للجواب ، أولا وريني شي قانون كايمنع توظيف الأقارب أو الفروع من تقلد المناصب العادية أو السامية إلا كانت كتوفر فيه الشروط والكفاءات المطلوبة ، من غير راجلي بإمكاني ندخل وليداتي أيضا ، ثانيا أنا تحملت مسؤولية إنجاح القطاع وبديت كنطعم الوزارة بالكفاءات لي ماكانت فيها نهائيا ، ولي زربو ماتو ، مايمكنش تبان النتائج ديال التدبير ديالي من دبا ما عدا إلا دازت ست سنوات ، فهمتي ولا لا ؟ أنا راني هضرت معك وكنحتارم الصحافة لأنني راني عطلة ,,,
عرجت بعد ذلك كاب 24على وزير الصحة السيد خالد الطالبي :
كاب 24: سي الطالبي نستسمح على إزعاجك وأنت في عطلتك القصيرة ، من بعد سنتين دازو عليك قاصحين بزاف ,, فاين وصلات التحقيقات مع المسؤولين والمسؤولات ديال وزارتك بخصوص الشكاية لي وضعتي هدي عامين لرئاسة النيابة العامة ؟ واش من غير هادوك المشتكى بهم مكاينش شي وحدين باقي دايرين بيك سواء فالديوان أو بعض المديريات لحد الساعة ؟ آش هدشي لي داير هاد ليام من التحرشات الجنسية على الممرضات والطبيبات ؟ واش زعما داك الإطار ديال الموارد البشرية لي ساكن فحانة فهرهوة ماسقتيش ليه الاخبار لا بالمباشر لا عن طريق الصحافة ، ايوا مايمكنش جالس كيستقبل عباد الله تما باسم وزارتك وكايعالج ملفات الترقية والتوظيف، زعما سلطة ديالك متخليكش تأكد من الكاميرات لي تم ؟ شنو السر ديال زيارة عناصر الفرقة الوطنية للشرطة القضائية للوزارة ؟ هدشي راه لايطاق مابقاش غادي تنفع معه العلاقة مع البروفيسور الماعوني، دوام الحال من المحال ، راه الدستور لي صوت عليه الشعب كايقول ربط المسؤولية بالمحاسبة ، واش موجد راسك ؟
الطالبي : _كوح كوح كوح ، بعد حوالي دقيقة من السعال _ سمح ليا راني شوية ضاربني البرد ، بالنسبة الملف المعروض على أنظار النيابة العامة لاحق لي في التدخل حاليا إلا بعد إنتهاء أطوار التحقيق والمحاكمة ، أنا كوزير حيدت المسؤولية عليا ملي زربت عليهم وحطيت بهم شكاية ، والإستماع الى إفادتي كان خاص في إطار الإمتياز القضائي ، أما التحرش الجنسي فراه كل شاة تعلق من كراعها ، لي تضررات من شي حاجة الباب راه مفتوح لوضع الشكاية ومعها الحجج والعدالة غاديا تاخذ المجرى ديالها وحتى الوزارة أيضا ,أما السيد لي ديما فالبار فعلا جاتني أخبار وأنا الآن فاتح بحث خاص غيسالي الأسبوع المقبل وناخذ فيه قرار ، البروفيسور الماعوني طبيب سيدنا هداك أبي الروحي وأستاذي أكن له كل الإحترام ، هو بعيد كل البعد عن هاد الخزعبلات ، وماعندو حتى شي علاقة فحال لي قالو شي وحدين أنه هو لي من ورايا ,,, الله يطول فعمرو , أما مطالبتي بالرحيل والله ماكرهت ، صافي لا إله إلا الله ، الحمل ثقيل ولي قال العصيدة باردا يدير فيها يديه ، ولي حصل عليا شي حاجة هاوجهي هاوجهو .
أمام هذه الإستجوابات وأجوبتها الإفتراضية ، فضلنا عدم إنهائها دون أن نطرح سؤالا على الطالبي العلمي رئيس مجلس النواب
كاب 24 : علاش أسي العلمي نعتي المغاربة الذين إنضموا إلى الهشتاغ من أجل تخفيض أسعار المحروقات ورحيل أخنوش بلمراض؟
الطالبي : غير سمحو ليا ,, داك الساعة كنت مريض.
هذا وستواصل كاب 24 إستجواباتها على هذا النمط مع وجوه أخرى كفاطمة الزهراء المنصوري ، وشكيب بنموسى ، وليلى بنعلي ، ومصطفى بايتاس وأحمد التوفيق ، وناصر بوريطة وآخرون ليسوا أقل نعتا من زملائهم في مطالب الرحيل ، إلى حين الوقوف وتشخيص الإختلالات الحقيقية والإعترافات الموضوعية المنتزعة من بعض المسؤولين الحكوميين الرافضين لإيصال المعلومة التي هي حق دستوري ، والهاربين من الحوارات الصحفية واضعين رؤوسهم كالنعامة تحت جناحها ، ونحن كإعلاميين أيضا سنضع عازلا طبيا بيننا وبين تصريحاتهم نحن في غنى عنها مادامت كلها لغة خشبية وتشكي ونفي الوقائع ,,,الشعب ينتظر رحيلكم بعد محاسبتكم ,,, وسنحتفل قريبا جدا بذكرى ثورة الملك والشعب بطعم جميل ,,,أقول ثورة الملك والشعب ولا دخل للحكومة فيها ..