‎قصيدة زجلية: ياحسرة

ف لحظة تغير حالك
واش عين صابتك ولا هذا مكتابك
بقيت وحدك وتجليت
من كل الاحباب تنسيت
لا من سول فيك و ف احوالك ولا من عرف اش جرا لك
الايام عليك جارت
والليلي بتخماك طوالت
ف لحظة تغير حالك
واش عين صابتك ولا هذا مكتابك
كنت اللي شافك ما يصدق
والزين فيك باغي ينطق
اللون خمري والشعر فتان
الخد باهي والسنين مرجان
اللسان حلو والكلمة موزونة
والبسمة بها الناس مفتونة
ف لحظة تغير حالك
واش عين صابتك ولا هذا مكتابك
قلبك كان صافي وكبير
يتسع للكبير والصغير
خيرك شمل كل الناس
عطيت من حبك بلا قياس
وقتك و مالك ماشي ديالك
ضحيت حتى حد ما بحالك
ف لحظة تغير حالك
واش عين صابتك ولا هذا مكتابك
العلة سكناتك والمرض فناك
خطاك الفرح والحظ نساك
ف مصابك قلو حبابك
نساو خيرك وتجاهلو عذابك
ما قالو اش بيك واشنو سبابك
ولا حد سول فيك ودق بابك
ف لحظة تغير حالك
واش عين صابتك ولا هذا مكتابك
يا حسرة على الدنيا و على الناس
عملو من المال مقياس
فين المحبة و الصداقة و الوفا
فين الحب وفين ايام الصفا
هذا درس من الدنيا خديه
ما بقات ثقة الخير ف نفسك عمليه
ف لحظة تغير حالك
واش عين صابتك ولا هذا مكتابك.