قصيدة زجلية: حن

مالك أوا مالك
مقاتل مع خيالك
اللي يجري بين لوتاد
يعثر يعثر
وصياد النعامة
يلكاها يلكاها مالك أوا مالك
ولدتي ما ربيتي ولاد
والغد شمس ما تستر
ما تنفع معاه فهامة
واللي يجي وراها
مالك أو مالك
ديما تذكر عيوبي
تغفل ديالك
وتشهد عجاج حروبي
علاش ما تفكر
ملي كنا صحاب
تجمعنا الأرض
ولكتاب
علاش
علاش ترسم بلحموم أيامي
وتزوقها بالدم
مالك
مالك تحرف كلامي
وتدفن الترياق
وتنبت السم
مالك أوا مالك
مالك ما ترد بالك
علاش حاسبني غريب
ما شي بحالك
واش أنا ما نحس
ما عندي نفس
تبغيني نكون خيالك
واش أنا ما نقيس
ما نعيش
ما شي من كرانك
حن
حن لا تمحم
وعطف لا تيه
واتلف
كلنا من ما
وطين
كلنا ناكلو الطحين
كلنا خوت
كلنا ساوا
علاش عليك الظلم ولعداوة.