صفحات من الزجل العتابي(شلا ناس)

"زجل" (شلا ناس)
ف هاد الدنيا كثرت الروينة,
كلشي بغا يمشي للمدينة,
بنادم ولا عايش عا بالكينة,
شلا ناس
تفضحو وفاتو لقياس,
ولو يفسدو قدام عينينا,
وخا هرمو وشاب الراس,
باقية ريحتهم تجينا,
درنا دفيفة وقلنا لباس,
ناضو وحيدوها لينا ,
لمسخ بعينيه ف الموضة واللباس
الذل حيح ودار روينة,
مابقا لا تفكير ولا احساس,
كلشي راب: حتا من الحيط لي بنينا,
واه شكون يكود الدراس,
كلشي منوعر الله ينجينا,
رطاب لعنك وتمضاو لماس,
داز الدم من تحت يدينا,
شلا تحياح :شلا هبال:شلا هواس,
عقولنا خمرو وتنفخو كي لعجينة,
الهم متكي الله يحد الباس,
جات المحنة, وحلفات فينا,
معوق العين مقوس تقواس,
حسدنا ف الدفة, والدْفا ديال والدينا,
حسدنا ف الشريبة من الكاس,
لو كان صاب, غا تغرق بينا السفينة ,
داك لي كان شريف ولا لحاس,
كالس ف قنت يتجسس علينا,
بغانا نمشيو كلنا لارواس,
بغا يحرق جذور الكبدة لحنينة,
بغا يكلسنا ف كلاس,
يساوم رواحنا ويرشم لودينة,
بغا يشربنا من الطاس,
يبردعنا ويتفوبر علينا,
لوكا ن صاب, نتهرسو تهراس,
حيث عليه غوتنا وشكينا,
لو كان صاب, يحفر بينا مْثلْ الفاس,
يرمينا ف حفرة ويخلينا,
لوكا ن صاب يطيح الساس,
لو كان صاب لوجيبة , يعرينا,
يا ويلي على هاد الناس,
كلامهم ولا يشقينا,
مقابلين غير التمْلاسْ,
بْنْغِيزْ هظورهم ماحسينا,
الكلسة ف القهاوي والتفلاس,
يا ميمتي توذرنا وتجلينا,
لي سمعهم لا بدا ما يتقاس,
لابدا ما تجيه حالة لقرينة,
لا بدا ما يتقطعو فيه لنفاس,
وتتهرس ليه السنينة ,
لا بدا ما يتكفس تكفاس,
ويلبس جلابت يامو لحزينة ,
لا بدا ما يتفايل ب لحباس,
يتسلسْلْ بقنط الويل يرجع رهينة,
ياك ,لي مابغانا يتساس,
يمشي لا باقي يسول فينا,....
تتبع.....
-الزجال ..عبد الرحيم يونس..
akraoun@hotmail.fr
0672513154