فتاة مغربية والديها عاناو ... رباو و قراو باش بنتهم تحصل على أعلى الشواهد وحلمو كذلك أنه فشي نهار غادي يشوفوها فشي خدمة تليق بمستواها التعليمي ... ودكشي لي كان خدات عائشة شهادة الاجازة ومن بعدها شهادة الماستر ... و طرقات جميع الأبواب باش تلقى شي خدمة ... لكن كيف ما معروف فبلادنا مع كامل الأسف ان هاته الأخيرة كتخضع لمبدأ المعرفة و التدويرة و باك صاحبي و خاصك تكون فالشبيبة ديال الحزب ديالي وهلم جرا ... و هدشي مكيتوفرش فعائشة حيث هي من عائلة بسيطة بنت الشعب تنحدر من طبقة فقيرة مسحوقة و مهمشة. عائشة قررت تناضل باش تحقق طموحها و طموح والديها والتحقت باحدى تنسيقيات الأطر المعطلة في الأيام الأولى من سنة 2011 وزادت معاناة القمع و الحكرة الى معاناة البطالة لكن عائشة كاع مستسلمات و لا هزات الراية البيضا وتحدات كل الصعاب واعتصمات فمقر حزب الاستقلال ونتج على دكشي توقيع محضر تم بموجبه اقصاء كل واحد عندو ماستر 2011 وللأسف كانت عائشة من بين من تم اقصاؤهم ... رجعات تناضل و ترفع صوتها ضد الحكرة و التهميش و فيوم من الأيام تنشر عبر الصحف خبر توظيف 166 شخص عندهم شهادة الماستر 2011 بوزارة التربية الوطنية دون مبارة ... عائشة و الرفاق ديالها فالنضال معجبهمش هاد الحيف و قرروا يعتصموا بملحقة تابعة لوزارة التربية الوطنية بعد مرور الأيام المخزن قطع عليها و على رفاقها المعتصمين الأكل و الشرب لي كانوا كيجيبوه تنسيقيات المعطلين كلما مروا من أمام الملحقة ... وفي يوم من الأيام قرر بعض المعطلين لي كانوا معتاصمين فالملحقة ولي من بينهم الشهيد " عبد الوهاب زيدون" و المصاب " محمود الهواس " ايجاد حل امام هذا الحصار لكن المخزن الندل كان له رأي اخر و قام باحراق كل من " زيدون " و " محمود " وبحرقهما حرق قلوب كل المعتصمين و معهم جميع المعطلين لي من بينهم طبعا عائشة ... فاجعة ما حصل خلا عائشة يزاد يقينها بالقضية لي كتناضل من اجلها ومبغاتش تسمح فحقها وحق خوتها لي ضحاو من اجل المطلب ... وجمعات القوى ديالها رغم ان الأمر لم يكن سهلا وعاودت الرجوع الى النضال بشكل اسبوعي ... مرت الأيام و الشهور و السنون وفكل شكل نضالي كيمر كيكونوا ضحايا وكتكون من بينهم عائشة. نهار الخميس خرجات عائشة رفقة باقي المعطلين و اثناء الشكل الاحتجاجي اعطيت الأوامر للتدخل فما كان من أحد الضباط إلا ان يظهر حقده من خلال التلفظ بكلام حقير كحقارته فكان ردها: ( حسبي الله و نعم الوكيل ) ... الضابط استفزته العبارة وضرب عائشة حتى طيحها على الأرض وجات الركبة ديالها على طريطوار ولم يكتفي بذلك وزاد زطم ليها على رجلها ولي للأسف بعدما تنقلات للمستشفى كشفت الفحوصات عن كسر ثلاثي على مستوى الركبة ... الخبر نزل كالصاعقة عليها و على باقي المعطلين ... عائشة كانت تحتاج الى عملية مستعجلة وغادي يديرو ليها الحديد ... بعد مدة ديال التفاوض مع المكلفين بمستشفى السويسي تقرر اجراء العملية ... و قاموا بتدعيم ركبتها بالحديد.... وبعد مرور ازيد من 3 ساعات وهعي في غرفة العملية خرجوها وداوها لغرفة الراديو باش يديروها ليها صورة و يشوفو واش العملية نجحات ليها ... لكن للأسف الأطباء اكتشفوا ان شي حاجة ماشي هي هاديك وردوها لغرفة العمليات من اجل اجراء عملية ثانية.
عائشة تعاني الأن برجل مكسورة لا تقوى على النهوض من الفراش ... وهي نموذج حي لما تعانيه الفتاة المعطلة من داخل شوارع الرباط .
ما المطلوب؟ المطلوب منا جميعا باش متطمسش قضية عائشة ... وباش حقها ميضيعش هو نعاونوها بنشر قصتها أضعف الايمان ... ونطالبو بمحاكمة المتسبب الرئيسي في كسر ركبتها ... عائشة اختنا جميعا ومخصناش نتخلاو عليها ... الرأي العام كيتشكل بيا انا و انت وهو و هي وهم و نحن ... كلنا معنيون من اجل فضح بحال هاد الممارسات لي كيديرها المخزن من اجل اسكات كل الأصوات المطالبة بالعيش الكريم
