أفينك ابابا حميدة برمش يا سلطان السروت وكبير العلامة ولا خيال في سربتك يهز العين ويرمش طحت في بالي وشحال بكيت طحت في بالي وما نسيت كيف ننسى والناس في علفاتك لسان وحتيت كيف ننسى وأنت عريس لمواسم رش وزغاريت ماشي غير آجي وتبورد ماشي من والا يركب العود ركوب الخيل والرماية وصية من وصيات النبي العدنان الشافع في أمته يوم ملﯕى خالق لكوان الخيل يا مالين الخيل فال وخير اللي كسبها يربح ويلﯕاه التسير السروت عشاقة والنظرة فيها تريح البال تزيد في لعمر وتنسيك هم الدنيا ولهوال لوان الخيل وزينها يهبل العين ها لدهم ها لزرﯕ ها نوارة الفولة ها حجر الواد ها البرﯕي وعود بابا كان لونه ﯕمري سارق بيوضة الﯕمرة في الليل تبري مول السبيب حرير والسناح زيتي قبيلته كل خيمة بعود وكل عود بعلام التبوريدة والمحرك ليها شروط وحكام اللي خالفها و قرقب ينزل على العود يسوﯕه في المجبد ﯕدام زوار الموسم باش الخيال ما يعاود يغلط ويتعلم من بعدك يا سلطان الخيل واللامة يا لمباردي وعلام زمانه بجوج مكاحل بلا ما يطيح ولا يميل تيتمت وما بقات شنعة ديك السروت الهلالية ولاعة الخيل سلالة من الجدود لحفاد معزتها كثر وكبر من معزة لولاد يجوع الولد وما يجوع العود يعطش الولد وما يعطش العود حينت الخيل ما يعرف شانها غير شيوخ الحركة والخيل هذا حال الولفية مع السروت اللصيلية مولاي عبد الله موسم لمواسم عليها شاهد العود وركابه جوج وفي السبﯕ واحد ما تفرقهم غير الموت وقبر فوﯕه شاهد.
