اتخنقت منك يا بلادي

.
خلاص اتخنقت
منك يا بلادى
ثورة قامت فيِك
بعرض الدلتا
بطول الوادى
شعبك هب
من مكانه
زلزل الأرض
تحت أقدامه
اتغنى العالم
لفرح شبابه
ولقهر أحزانه
مصر
اسمك
ملِىء الارض والسما
كرمك الله
في قراّنه
وأخرتها تِسقطي فرعون
لأجل تنصبي خلانه !!..
خلاص خنقتينا
هدرتي دم الشهيد فينا
والمشير كأنه مش هنا
او مش من هنا
ناسي انها ثوره
والثوره مش محتاجه
تستعطي عطفه وحنانه..
الثوره اللى خلعت مبارك
ممكن تخلعك
لو كنت وتد ف قصر
أوعى تنسى مصر
أوعى نياشينك على الكتاف
تخدعك
الظلم ملوش سقف
وعمره ما دَارِت عليه حيطانه
اتخنقت منك يا بلادى
البلطجه مش طبع فرد من شعبك
البلطجة صناعة
والماركة
( بلطجية مِن صُنع حكامك )
الداخلية عندها قوايم
ممكن يلموا البلطجية
والمجلس ممكن
يعدل وتكون يده قويه
لكن نقول لمين
و نهاتى ف مين
اذا كان حاميها يد للمخلوع
كبير الحراميه
ولاده صحاب ولاده
امواله مغسوله ف امواله
والفقير يعمل ايه
غير انه يحادى على عياله
يَسكَر عليهم الباب
خوف مِن تقوم ثوره
فيستشهد ابنه
وتنضرب ام الشهيد
ويموت هو منك قهر يا بلادى
خلاص اتخنقت منك يا بلادى]