يوم الفراق

بقلم بكوش جمال
يا الساخي
عينك ما دمعات
يا الساخي
عيني انا ما جفات
يوم الفراق
النار في قلبي ولعات
تحرقت الأشواق
الكبدة … رماد ….فتات
يا الساخي
في ذواخلي شدات العافية
….. بيت من النار
ولا نقولوا زوبية حامية
تكدي__ تاكل في ضلوعي
شكون يطفي
و يزيد فهباها
يا الساخي
كنتشوى
كنتقلب على جنابي
طبت بصهد حبك
تكويت بنار ولفك
ومازال قلبي فحبك يجمع
ومازال العين عليك تدمع
آش هاد الحب حبيتك
آش هاد الغرام
كيف الباطل
وطاح علية
يا الساخي
ياقلب الحجر
دخلت عليك
بكل من صلى وقام الفجر
دخلت عليك
بزينت الليالي …ليلة القدر
خليك لا تهجر
على فراقك ما نصبر
ما نقدر
ها أنت شوف
يدي بلا شواري
فيك شادة
شدة العمة لعكازو
ها أنت شوف
لرياح بسبعة
كيف تجني بالدمعة
ونغيب على الدنيا
وما يفيقني
غير كاس الهوى
لما يتخوى …. على صدري
بارد
كيف الما الدافق من العيون
كيف البير المقابل النجوم
بغيت فيك حقي
بغيت فيك النص
بغيتك كامل
بغيتك لي وحدي
ما يشاركني فيك
غاشي ولا ماشي
تكون غطاية وفراشي
تكون أنت…..؟؟؟
شكون أنت….؟؟؟
علاش أنت….؟؟؟
فين أنت….؟؟؟
يا لي تستاهل