صرخة قصراوية

القصر الكبير
مدينتي يا مدينة الجد و الكد
مدينة الأصل و العروق لماعندم حد
مديني يا مدينة الخير
خلو كل حفرة فيك قد البير
القصر الكبير
بلاد الجوامع و الأولية
ردوك مهزلة و مركز المثلية
القصر الكبير
رجالك لي هزمو ثلاث ملوك
فكل انتخابات جيبو لي حكمك صعلوك
القصر الكبير
باش يبنيوك و فتحو الأوراش
هدرتي على الحق ردوك من الأوباش
القصر الكبير
حمات المغرب كله من البرتغال
جازيتوها، عمرتو شوار عها بالبغال
القصر الكبير
مدينة التاريخ، لي تحت و لي فوق الأرض
دخلتوها ، و لات كلها مرض
القصر الكبير
-ابيدوم نوفوم - عاصمة الرومان
عمارت على يدكم كرارس و قشور البنان
القصر الكبير
جاو البيزنطيين ردوها شان و همة
سبحان الله، و صلتو نتوما ولات عليكم نقمة
القصر الكبير
المرينيون بناو فيها المدرسة العينانية
فوقتكم المدارس ولات أوكار شيطانية
القصر الكبير
لي كانت منارة العلم وزارها ابن خلدون
رديتوهاسوق القرقوبي و الأفيون
القصر الكبير
واد اللوكوس و حدائق الهسبيريديس
ما بقا والو معاكم
زرع تو فيها كل شيطان ولد إبليس
القصر الكبير
بلاد الثقافة والفن
فزمانكم ولات مزابل عامرة بالعفن
القصر الكبير
فيها صنعتو هاد الجيل
ما جبرت ما نقول غير
حسبي الله و نعم الوكيل
القصر الكبير
العالم فيها منبو د
الجاهل فيها معبود
الشفار فيها مسنود
و التهميش فيها مقصود
القصر الكبير
أنا قصراوية غيورة عليك
نمشي فاين ما مشيت
منتخلاش عليك
القصر الكبير
بكيت و باقا نبكي عليك بالدم
وإلا كتاب نرجعلك وعليك نخدم
القصر الكبير
فيك و منك خرجو علماء أحرار
ما يخافو قطع لسانهم بالمنشار
القصر الكبير
لي كانت ريحتك اوكاليبتوس و تفاح
ولا يتخبع فيك كل من هو سفاح
و لي غراسيك تفوح بالنعناع
ولا البشر فيك كيتباع
القصر الكبير
باقي عندي الأمل فشي نهار
يطلع فجرك،يرجع ربيعك و يطيح الستار
القصر الكبير
ما بغيت منك والو
بغيت غير كل واحد يحسب قوالو
القصر الكبير
ماشي بلاد الوسخ و الفساد
مدينتي مدينة المقاومة و الجهاد
القصر الكبير
ولاو يقولو: آه قصراوة! بلاد المثلية
بزاف عليكم.....
مدينتي مدينة الزوايا و المدارس القرانية
القصر الكبير
مازال عندي أمل في قصراوة الأخيار
را القصر دائماً ولد ولاد أبرار .
ولاد السوق ماشي قصراوة الفقرا
ولاد السوق هما لي جاو للقصر مزاليط، دارو فيه عمارة.
خوتي القصراوة ديرو يد فيد
نودو تخدمو القصر بمسق الجد
را القصر لي كان في العلم منارة
ردوه بلا د لا قانون و الدعارة
القصر الكبير
معالمه التاريخية منسية
إيه يا زمان، يا عاصمة الدولة الوطاسية
هدمو دور الفن و مسارح الافتخار
بناو فبلاصتها القهاوي و البيار
القصر الكبير
مدينتي الحبيبة عيتي ما تشوفي من هذاك و هاذا
راهم نساوك بلاد العلم و الشهادا.
إلا وقفتي ما تجلسيش
وعلا حقك ما سكتيش.
يا الجاهل بالقصر قرا تاريخو المجيد
تعرف قصراوة عمرهم ما كانو عبيد.
لي حترمنا و هزنا فوق راسو
نحترموه أكثر من قياسو.
يا الجاهل بالقصر فهم شوية
هذا الزجل فحب القصر ماشي توعية.
أما قصراوة فاهمين،عايقين و فحب القصر غارقين.
أما لي عاد جا للقصر
و من دم ناسو رجع صقر
دار فيه الفلوس و لحضنه غدر
جا وقته، بمولاي علي بوغالب كيتسناه القبر.
القصر الكبير
مدينتي الحبيبة زيديني حب فيك زيديني
و حتى إلا نسيتك ،انتي ما تخليني
و يا ربي يا خالق السما و القمر
احمي مدينتي من هاجوج و مأجوج لي حضر
بنساها و رجالها
قادر ترجعها كيما كانت و أكثر