قصيدة زجلية:زمان الغير

تقلعو الاوتاد الحبال تقطعات
مابقينا عارفين الاولاد من البنات
المدجة في العنق
كل اصبع بخاتم
الطانكة في الاذن
في الوجه الماكيج
التشويكة في الشعر
السروال محلول واللا مدلي
الريحة في الصدر والباط
والعقل مطوط تطواط
تخلطو الاوراق
والصابرة تخبلات
ما بقينا عارفين الاولاد من البنات
البنت كرطات الشعر
القنانف مجلخة عكر
عرات الكتاف
والبوط ديما عريان
فيه خرصة
وطانكة كيف العجل في المنخر
زيرات الدجين وكثرات التزيار
نتفات الحجبان
جبدات الشفار
وتلفات في المشيان
اللونتي في العينين
في لون القميجة والسروال
الطالون عالي فات الطولان
صونا البورتابل.....آلو
بابا هذا غير كمال
مع من تتكلم وشكون تلوم
تلوم الوالدين
المغلوبين بحر الاولاد والزمان
واللا تلوم الحكومة والبرلمان
بالحق قبل ما نلومو
ونشوفو اللي خصو يتلام
نشوفو بعدا وآش هذا زمانا
واللا زمان الميريكان