مكافأة للاعبين ديال الوداد بعدما طلعوا لصدارة البطولة

غيستافدو اللاعبين ديال الوداد الرياضي من عطلة قصيرة، من بعد المجهود الكبير اللي داروه خلال الأيام الماضية وليماتش المتابعين اللي لعبو فالبطولة الاحترافية وكأس العرش.
وقرر الإسباني كارلوس كاريدو مدرب الوداد الرياضي مكافأة اللاعبين من بعد الرباح البارح على اتحاد التواركة، وعطاهم اليوم الأحد عطلة باش يرتاحو ومنها يدوزو وقت مع عائلاتهم، وهذا الشي قبل ما برجعو الاثنين باش يبداو يوجدو لمواجهة سيمبا التنزاني في ربع نهائي عصبة أبطال إفريقيا.
التدخلات اللي قام بها رئيس الوداد الرياضي سعيد الناصيري بتعيين الإسباني كارلوس كاريدو قبل أسابيع كمدرب جديد للفريق وتصفية الخواطر وسط اللاعبين وبالفيستيير، أثرت إيجابيا على لكروب الودادي اللي محقق مؤخرا، نتائج إيجابية حيث طلع البارح لصدارة البطولة الاحترافية وقبل منها بيومين تأهل إلى ربع نهائي كأس العرش.