قضية سعد لمجرد.. سيد خدام في لوطيل قدام المحكمة: شفتو خارج بالكالصون تابع لورا لي كان تريكوها مقطع وتكا على ركابيه كيزاوكَ فيها باش متعيطش لبوليس

في هاد اللحظات المحكمة في فرانسا كتسمع لموظف لي كان شاهد على الليلة لي تشد فيها المغني سعد لمجرد لي كيتحاكم في حالة سراح بتهمة اغتصاب لورا.ب سنة 2016.
كيفما نقلات صحافية فرانساوية حاضرة للجسلة هاد الصباح قال أنه شاف لمجرد خارج من لاشومبر بالكالصون وكان تابع البنت لي تريكوها مقطع، وواحد اللحظة جلس على ركابيه وبدا كيزاوكَ فيه باش متعيطش البوليس. وقال "السيد كانت شاداه الخلعة".
ووضح الراجل قدام المحكمة أنه حاول يطمأن لورا ويسكتها باش متبقاش كتبكي ومخلوعة، وواحد اللحظة دخلات وسدات عليها في واحد البيت لي بقات فيه حتى جاو البوليس.
وكانت المحكمة سمعات البارح للمجرد لي قال أنه ديك النهار كان مبوق بالكوكايين ولكن ماشي لدرجة أنه يفقد الوعي ويبدا يتصرف بعنف مع البنت لي مشات معاه للفندق باش يكملو السهرة.