بيريز رئيس ريال مدريد عاجبو المغرب وكيشكر المغاربة حيث تهلاو فالفريق الملكي

عبر رئيس ريال مدريد الإسباني فلورينتينو بيريز على الإعجاب ديالو بالمغرب وبالبنية التحتية ديالو، وهادشي خلال حضورو لقاء مع جمعيات مشجعي ريال مدريد اليوم السبت بقصر المؤتمرات بالسلا.
وتحدث رئيس ريال مدريد الإسباني فلورينتينو بيريز مع رؤساء جمعيات ريال مدريد فالعالم ومنهم المغاربة، فهاد اللقاء اللي كانوا حاضرين مسؤولين فريال مدريد ونجوم سابقين بالفريق أيضا وقال: "الفريق ديالنا لاعب فتيران مولاي عبد الله بالرباط، فحالا لاعب فالبيرنابيو بمدريد".
وكشف عبد الله الكوزي رئيس جميعة "لابينيا مدريدستا القنيطرة" المساندة لريال مدريد واللي كان حاضر فاللقاء مع فلورينتينو بيريز، وقال فالفيسوك ديالو: "بيريز أشاد بما يتوفر عليه المغرب من تجهيزات رياضية، وقال أن حب ريال مدريد كيسكن قلوب المغاربة".
وغيلعب ريال مدريد فينال الموندياليتو اليوم السبت فتيران مولاي عبد الله بالرباط مع الهلال السعودي مع 8 الليل، والفريق الإسباني فرحان بزاف بالاستقبال اللي داروه له المغاربة ملي وصل الاثنين الماضي للرباط، وهادشي بشهادة المدرب كارولو أنشيلوتي والاعبين ديال الفريق.