أولمبيك آسفي: ما يمكنش نجازفو بلاعب عندو 4 إنذارات ضد الرجاء حيث حنا لاعبين على لقب البطولة

خرج أولمبيك آسفي ينفي بلي اللاعب ديالو سليمان لمراني كانت عندو 4 البطائق صفراء قبل ماتش الفريق ضد الرجاء الرياضي السبت الماضي فالبطولة، وأكد أن هادشي افتراء وتشويش على الفريق اللي ربح الخضرا بنتجية 3 لواحد.
وتحدث ابراهيم الفلكي الناطق الرسمي ديال أولمبيك آسفي قبل لحظات على الصفحة الرسمية ديال الفريق، وأكد أن الوضعية ديال اللاعب سليمان المراني اللي قدم الرجاء الرياضي طعن فمشاركتو فماتش الفريقين سليمة وأن اللاعب ما كانتش عندو 4 البطائق صفراء قبل المباراة، وأن هادشي اللي كيروج غير تشويش على أولمبيك آسفي، وأن اللاعب الروحي هو اللي خدا بطاقة صفراء فماتش السوالم قبل ماتش الرجاء ماشي المراني.
وشدد الناطق الرسمي ديال أولمبيك آسفي أن عندو إدارة متمرسة ومشهود لها بالكفاءة من الجامعة الملكية المغربية لكرة القدم، وأن الفريق ما يمكنش يجازف ويدخل لاعب عندو 4 الإنذارات حيث غيخسر الماتش والفريق كينافس على الصفوف الأولى بل كينافس على اللقب وهذا حق مشروع.