الركراكي: فخورين بالمغربية ديالنا وفرحانين حيث استقبلنا سيدنا وهذا حلم أي واحد

عبر الناخب الوطني وليد الركراكي على الفرحة ديالو بالاستقبال اللي خصصو الملك محمد السادس البارح الثلاثاء، للمنتخب الوطني المغربي بعد العودة ديالو إلى المغرب من قطر اللي حقق فيها إنجاز تاريخي باحتلالو المركز الرابع فكاس العالم 2022.
وقال الناخب الوطني وليد الركراكي فتصريح لقناة الرياضية: "فرحان بزاف حيث استقبلنا الملك محمد السادس راه أي واحد يحلم بهاد اللقاء، وفخورين بالمغربية ديالنا، كنا باغيين نعطيو كثر لبلادنا وعطينا جهدنا كامل، كنشكر الملك على هادشي اللي كيدير على قبلنا وقبل الشعب وعلى الرياضة المغربية".
وكان المنتخب الوطني المغربي وصل البارح لعشية إلى المغرب قادما من قطر واحتفلو معه المغاربة ملكا وشعبا بالإنجاز اللي حقق باحتلال المركز الرابع فكأس العالم 2022، فانجاز غير مسبوق لكرة القدم المغربية والإفريقية والعربية.