فضيحة التذاكر.. الريع معشش فكولشي: برلمانيون كيتاصلو بإدارة لارام ويضغطو باش يمشيو لقطر وصدماتهم ورئيس لجنة خدا 250 تيكي وتسجيل صوتي منسوب لرئيس أولمبيك آسفي منوض قربالة

علمت "كود" أن فضيحة التذاكر ديال مباريات المغرب فقطر، كشفات وجه آخر من "باك صاحبي" والتدخلات لي دارت باش كولشي يمشي لقطر، بمن فيهم مسؤولين وبرلمانيين.
مسؤول في مكتب مجلس النواب قال ل"كود" بأنه فعلا برلمانيين ومنهم هو نيت تاصل بلارام باش يمشي، حيث عندو بطاقة هيا حصل عليها عن طريق أصدقاء، وكاين برلمانيين آخرين لي شراوها، ولكن لارام متجاوبوش معه ومعطاوهش تذكرة الطائرة.
هاد البرلماني كعا ونسق مع مجموعة أخرى وتافقو يجبدو الموضوع فالبرلمان ويناقشوه مع الوزراء.
فهاد الفضيحة ديال التذاكر، مسؤولين ف"لارام" رفضو يلبيو طلبات عدد من البرلمانيين، ومنهم عضو فمكتب مجلس النواب (ثالث مؤسسة في هرم الدولة حسب الدستور).
دبا خرج تسجيل صوتي منسوب لبرلماني ورئيس فريق أولمبيك آسفي، واش صحيح أو لا، مهم نايض عليه صداع كبير وفيه اتهامات ببيع جوج تذاكر ب12 ألف درهم.
ومصدر آخر، حضر فقطر قال بلي رئيس لجنة برلمانية وقيادي حزب وملايري وماشي عضو فجامعة الكرة، حصل على 250 تذكرة. كيفاش دار ليها؟ وشكون عطاها؟ فضيحة.
الفايسبوك شاعل بهادشي واتهامات من جميع الجهات. في انتظار يكون تحقيق رسمي يوضح كولشي.