ودع المنتخب الوطني المغربي كأس قطر 2022 اليوم الاربعاء من نصف نهائي البطولة من بعدما خسر أمام المنتخب الفرنسي فتيران البيت بنتيجة 2 لزيرو، بالتالي تأجل حلم بلوغ نهائي كوب ديموند بالنسبة للكرة المغربية والإفريقية والعربية. ونجح المنتخب الفرنسي فافتتاح التسجيل فالدقيقة 5 من الشوط الأول من بعد خطأ وارتباك فصفوف الدفاع ديال المنتخب الوطني المغربي، وهو الهدف اللي ماركاه الظهير الأيسر هيرنانديز واللي كان بوحدو بدون مراقبة أمام لكول ياسين بونو وحط الكرة فالمرمى المغربية، وكان جواد ياميق قريب من تسجيل التعادل للمغرب من ضربة مقصية واعرة ولكن المرة ضربت فالبوطو، وعرفت آخر اللحظات ضغط مغربي فمحاولة لإدراك التعادل ولكن سالا الشوط الأول واحد لزيرو الفرنسيين مع العلم أن المنتخب الوطني كيخروج لاول مرة متاخر فالجولة الأولى ملي بدا كأس العالم قطر 2022. وعرفت المبارة قبل بدايتها تغيير بتشكيلة المنتخب الوطني المغربي حيث غاب نايف أكرد عن الماتش وهو اللي كان بالتشكيلة الرسمية اللي علن عليها المدرب وليد الركراكي قبل اللقاء، ودخل بلاصتو أشرف داري ومن بعدما تسجل الهدف الاول على المنتخب خرج غانم سايس اللي موعت ودخل بلاصتو سليم أملاح ورجع الركراكي كيلعب بالطريقة اللي تعود عليها ملي بدا كأس العالم وعزز وسط الميدان. وفالشوط الثاني حاول المنتخب الوطني المغربي يرجع فالنتيجة وضغط من البداية وغير الناخب الوطني وليد الركراكي وخرج نصير مزراوي اللي تبين بلي ما وجدش ودخل يحيى عطية الله اللي منح انتعاشة للجهة اليسرى، وخرج يوسف النصيري ودخل عبد الرزاق حمد الله ودخل زكرياء أبوخلال بلاصة سفيان بوفال فمحاولة لانعاش الهجوم ومن بعدها دخل عبد الصمد الزلزولي وخرج سليم أملاح، ولكن كان التسرع وقلة التركيز طاغين على اللعب ديال العناصر الوطنية اللي ضيعو بزاف فرص التسجيل، وبالمقابل نجح المنتخب الفرنسي من الفرص لقليلة اللي جاتو فالشوط الثاني يعزز النتيجة بهدف ثاني عن طريق تيرام اللي دخل كبديل واستغل مرة أخرى هفوة دفاعية فالتغطية للاعبين المغاربة قدام مرمى ياسين بونو وحط الكرة فمرمى المنتخب المغربي فالدقيقة 79، وحاولو من بعد منها اللاعبين المغاربة يرجعو فالنتيجة ولكن ظلت الامور كما هي حتى سالا الماتش. وبهاد النتيجة سالا الحلم الزوين ديال المنتخب الوطني المغربي فكاس العالم قطر 2022، اللي خلق فيه المفاجأة وكان الحصان الأسود ديال هاد المونديال وصبح أول منتخب إفريقي وعربي كيلعب نصف النهائي كأس العالم وغادي يلعب دابا ماتش الترتيب على المركز الثالث ضد كرواتيا السبت الجاي، أما فرنسا حاملة اللقب تاهلت لفينال كوب ديموند وغادي تلعب الأحد المقبل ضد الارجنتين.
