لوريس حارس فرنسا: المغرب خصم صعب وأغلبية الجمهور اللي غادي يكون فالتيران ضدنا

أكد هوكو لوريس حارس مرمى المنتخب الفرنسي أن المنتخب الوطني المغربي الخصم ديالو فنصف نهائي كأس العالم قطر 2022، وقوي واعترف أيضا بقوة الجمهور المغربي وكيتوقع يكونو المشجعين المغاربة حاضرين بزاف فتيران البيت غدا الاربعاء ضد الفرنسيين.
وقال هوكو لوريس فالندوة الصحافية اللي كتسبق ماتش المغرب وفرنسا: "المغاربة ربحو بلجيكا وإسبانيا والبرتغال وتأهلو من كروب صعب فدور المجموعة وهادشي كيبين الإمكانيات ديال منتخبهم والروح اللي عندو سوا فتيران أو برا الملعب وغادي يكون خصم صعب".
وكمل لكول ديال فرنسا وقال: "حنا عارفين بلي الاغلب الجمهور اللي غادي يكون حاضر فالماتش غادي يكون ضدنا ولكن حنا موجودين لكل شي ومكالمين ومركزين وحللنا ودرسنا الخصم وطريقة اللعب ديالو مزيان".