دومي فينال كوب ديموند.. أرقام قوية للمغرب وفرنسا قبل الماتش التاريخي

كيتعتبر المنتخب الوطني المغربي هو صاحب أحسن دفاع فكأس العالم قطر 2022، من بعدما تأهل لنصف نهائي البطولة البارح السبت، ملي ربح منتخب البرتغال بنتيجة واحد لزيرو فربع النهائي.
وكينفرد المنتخب الوطني المغربي برقم مهم فهاد النسخة من كأس العالم، حيث هو المنتخب الوحيد من بين المنتخبات اللي تأهلت للمربع الذهبي اللي تسجل عليه هدف واحد فقط، الشي اللي كيخلي الدفاع ديالو هو أحسن خط دفاع من بين المنتخبات 4 اللي فهاد الدور.
وكان الهدف الوحيد اللي تماركا على المنتخب المغربي تسجل فالماتش الثالث فدور المجموعات ضد كندا بشكل عكسي ملي ضربت الكرة فالمدافع نايف أكرد ودخلت مرمى ياسين بونو، وبالمقابل سجل هجوم المغرب 5 أهداف.
بخصوص منتخب فرنسا الخصم المقبل للمنتخب الوطني المغربي فنصف نهائي كأس العالم قطر 2022، فتسجلت عليه إلى حدود أمس 5 الأهداف كان آخرها ضد الننكليز فربع النهائي أمام الهجوم ديالو ماركا 11 هدف، وكيتوفر فالصفوف ديالو على هداف هاد النسخة إلى حدود الآن كيليان مبابي اللي مسجل 5 الأهداف.