السوالم: رضوان الحيمر كينشر الإشاعات وخدا فلوسو

نفت إدارة شباب السوالم بلي المدرب السابق ديال الفرقة رضوان الحيمر كيسالها شي حاجة كيفما قال هو فواحد التسريب صوتي وأكدت بلي كتحتفظ بحقها باش تدعيه للقضاء.
وخرجت إدارة شباب السوالم ترد على رضوان الحيمر المدرب السابق ديال الفرقة، واللي خدام دابا مع الكوكب المراكشي وكذبت داكشي اللي كيقول، بلي كيتسالها لفلوس، وقالت فبلاغ لها بلي تلقات باستغراب تصريحات ديالو واللي سالا الارتباط ما بينو وبين النادي بالتراضي، وبطلب منو هو وهادشي الموسم اللي فات من بعدما توصل بجميع المستحقات ديالو.
شباب السوالم اتهمو رضوان الحيمر بلي كيحاول يأثر على مسار الفرقة وقررو يحتافظو بحقهم فاللجوء إلى القضاء باش يواجهو الإشاعات اللي كيقصد بها النيل من سمعة النادي والتشهير بالمسيرين والأطر واللعابا ديالو.
وكان رضوان الحيمر عبر على الغضب ديالو فواحد أودي مسرب من زكرياء عبود المدرب الحالي ديال السوالم وقاله يدخل سوق راسو وما يبقاش يدخل ما بينو وبين رئيس السوالم اللي كيتسالو لفلوس حسب ما قال.