فضيحة بجلايلها مولاها ميارة والباطرونا.. حط صاحبو حفظي فالمجلس الأعلى للتعليم وبصفة ممثل نقابة الاتحاد العام للشغالين وبلا خبار لا الباطرونا ولا حزبو

فضيحة جديدة فتعيينات أعضاء المجلس الأعلى للتربية والتكوين والبحث العلمي، عنوانها الولاء النقابي والحزبي و"الوزيعة" وبطلها رئيس مجلس المستشارين النعم ميارة.
ميارة حالف يحط صاحبو فالاتحاد العام للمقاولات بالمغرب، عبد الإله حفظي.. اوا كيف دار ليها؟ طبعا واحد تخريجة غريبة عجيبة، حطو بصفتو ممثل الاتحاد العام للشغالين بالمغرب.
لي معروف هو أن عبد الإله حفظي ف الباطرونا، وحتى واحد مكيعرفوش بلي كينتمي لنقابة حزب الاستقلال.
هاد القالب لي داير ميارة مفخبارش لا قيادة حزب الاستقلال ولا نقابة الباطرونا. فضيحة سياسية كبيرة.
"گود" سولت قيادي استقلالي واش حفظي معهم فنقابة الحزب، حاولنا، وقال بلي هاد السمية ممعروفاش ف النقابة.
كيفاش دار ميارة تا دخلها بلا خبار حزبو ومخلي قيادات نقابية تظل تناضل ليل ونهار ونساها وجاب واحد قريب ليه، صاحبو من الباطرونا باش يدخلو.
هاد الصفقة السياسية الغريبة، مفخبارش الباطرونا، وهنا كولشي كيستاءل: واش حزب الاستقلال باغي يخترق الباطرونا ويستقطب أعضائها؟، وهادي خطيرة على تنظيم مقاولاتي خصو يكون بعيد على التسييس. واش تيار حمد ولد الرشيد باغي يتحكم حتى ف الباطرونا بعدما تحكم فهياكل حزب الميزان؟.