المنتخب المغربي لكرة القدم الشاطئية خسر مع مصر بالشمتة وفشل فالتأهل لفينال كأس إفريقيا والمونديال

فشل المنتخب الوطني المغربي لكرة القدم الشاطئية إلى نهائي كأس أمم إفريقيا وكأس العالم لكرة القدم الشاطئية، من بعدما خسر مع منتخب مصر بالشمتة فنصف نهائي كأس إفريقيا المقامة فالموزامبيق.
وخسر المنتخب المغربي مع المصريين فماتش مشوق وصعيب بنتيجة 5 لبيوتا مقابل 4، ودخلو المغاربة بشكل قوي حيث خرجو متفوقين فالشوط الأول بنتيجة 2 لزيرو.
والفجولة الثانية غادي يدير المنتخب المصري الريمونتادا أمام المنتخب المغربي، وقلب التأخر ديالو إلى تقدم بنتيجة 3 مقابل 2، لكن اللعابا ديال المغرب قدرو يرجعو فأخر لحظة وجابو التعادل وسالا الشوط الثاني بنتيجة 3 مقابل 3.
واضطر المنتخبان باش يلعبو الشوط الإضافي، واللي بداه المغرب مزيان وماركا فالأول ديالو الهدف الرابع، لكن غادي يتمكن المنتخب المصري من قلب النتيجة مرة أخرى وماركا التعادل والرباح فالوقت اللي عجزو فيه هذا المرة اللعابا المغاربة فالعودة فالماتش اللي سالا بنتيجة 5 مقابل 4 لمصر.
وبهاذ الخسران ودع المنتخب الوطني المغربي لكرة القدم كأس أمم إفريقيا لكرة القدم الشاطئية وفشل أيضا فالتأهل لكأس العالم.