عاجل. مهرجان مراكش راجع قوي. هاد المخرج الايطالي الشهير رئيس لجنة تحكيم الدورة 19

اعلنت مؤسسة مهرجان مراكش الدولي للفيلم ان المخرج الايطالي المعروف باولو سورينطو هو رئيس لجنة تحكيم الدورة 19 اللي غادية تكون ما بين 11 و19 نونبر الجاي
وفتصريح جا فالبيان الرسمي للمؤسسة قال سورينطو باللي فهاد المهرجان تحقق فيه حلمو باش يشوف عدد من الافلام برفقة مارتن سكورسيزي. واكد باللي رئاستو للجنة التحكيم "شرف كبير" ليه وتوقع باش القاعات السينمائية ايام المهرجان تكون عامرة لاكتشاف افلام رائعة
واضاف باللي غادي يكون شاهد "على هذه الصحوة الجديدة من موقعي هذا الذي يحمل الكثير من الرمزية، وأن أكتشف سينما الغد من وجهة نظر ثقافية وجغرافية ذات أهمية بالغة يُعد بالنسبة لي هدية إضافية جميلة."
هادا اول اعلان عن المهرجان اللي رجع بعد عامين من الغياب بسباب كورونا.
باقي اعضاء لجنة التحكيم مازال ما تعلنش عليها. هاد الاعضاء غاديين يختارو للي غادي ياخد النجمة الذهبية لمراكش وباقي الجوائر من بين 14 فيلم مشارك فالمسابقة الرسمية
هادي عودة قوية للمهرجان مع هاد المخرج مول "يد الله" على مارادونا ومدينتو نابولي و"البابا الجديد" اللي داز ف"نتفلكيس" وجمع جود لو ومالكوفيتش و"عواقب الحب" و"صديق العائلة" و"ايل ديفو" و"لا بد ان يكون هذا هو المكان" و"الجمال العظيم" و"شباب"...