كاينة خبارات كدور على إعفاء مسؤولين فالدائرة القضائية ديال كازا.. ومصدر "گود": هادشي غير فايك نيوز

اليوم فالصباح خارج ميساج داير ف"واتساب" ما بين المحاميين والناس ديال القضاء كيقولو فيه بللي كاينين مسؤولين قضائيين بالدائرة القضائية كازا مشاو فحالهم، وذلك على خلفية سقوط عصابة ديال التسمسير اللي هي إمتداد لعصابة "هشام لوسكي" المضروب ب8 سنين ديال الحبس، بحيت كتقول الرسالة المتداولة أن جوج نواب ديال وكيل الملك بالمحكمة الجزرية بعين سبع توصلو بقرار التوقيف من الخدمة حتى يصدر المقرر النهائي فموضوع المتابعة.
مصدر خاص ديال "گود" قال أن الخبار اللي دايرا على تعيين حسن جابر رئيس ديال المحكمة ديال عين السبع بالتفويض وعلى هادوك المسؤولين القضائيين اللي تعفاو غير فايك نيوز ومجرد إشاعة مطلوقة.
وأضاف المصدر نفسو أن أصلا قرار الإعفاء من المسؤولية اللي عندو الحق يبت فيه هو اجتماع المجلس الأعلى للسلطة القضائية، مسترسلا بأن الوكيل العام راه أصلا خرج كونجي نهار الإثنين اللي فات مباشرة من بعد التقديمات اللي تدارو على ود داك الريزو ديال السمسارة.