"الفيلم" ديالهم مزال ماسالاش.. شيرين عبد الوهاب كتطالب بمنع طليقها من السفر برا البلاد

"الفيلم" ديال المغنية المصرية شيرين عبد الوهاب وراجلها السابق حسام حبيب مزال ما بغاش يسالي، والاتهامات بيناتهم مزال كتروج فالمحاكم المصرية بعدما رفع حسام على شيرين دعوى قضائية بتهمة "السب والقذف".
القضية جات بعدما شبعات شيرين "معيور" فطليقها، في برنامج مع الإعلامية المصرية لميس الحديدي، وقالت بللي خلاها على الضص بعدما شفر فلوسها وحاصرها فنيا طيلة مدة زواجهم، رغم أن هاد المشاكل كانت قبل كتحاول شيرين ديما تسترهم باش مايخرجوش للعموم أو لوسائل الإعلام.
فالمقابل طالبات شيرين عبد الوهاب باش يتمنع راجلها السابق من السفر برا بلادهم ويحيدو ليه الطوموبيل اللي شراها من فلوسها الخاصة.