من بعد تعيين العميدة.. الميراوي حل الكونكور ديال رئاسة جامعة سطات باش يعوض الرئيسة المعفية خديجة الصافي

علنات وزارة التعليم العالي والبحث العلمي والابتكار في الجريدة الرسمية على فتح كونكور ديال بوسط رئيس جامعة الحسن الأول فسطات ،من بعد ما عبد اللطيف الميراوي وزير التعليم العالي والبحث العلمي والابتكار طير خديجة الصافي بسباب الفضايح اللي وقعات تحت اشرافها .
الميراوي علن على بداية السحب ديال الترشيحات لي كاينة في مقر الوزارة وفي الموقع الالكتروني ديالها باش لي باغي يولي رئيس ينوض يشمر على كتافو.
هاد الإعلان فالجريدة الرسمية تزامن مع اعلان مصطفى بايتاس الناطق الرسمي باسم الحكومة البارح الخميس على تعيين حسنة كجي عميدة ديال كلية العلوم القانونية والسياسية فسطات في بلاصة نجيب الحجيوي لي عفاه أخنوش بسبب الفضايح ديال الجنس مقابل النقط والمال مقابل النقط او زيد او زيد .
مصادر " كود " قالت ان الميراوي خاصو بالزربة يشوف من حال الجامعة ويعين رئيس لأن الوضع الحالي مافيه مايعجب.