واش لهاد الدرجة التقدم والاشتراكية مافيهش معارضين لنبيل بنبعد الله.. المرشح الوحيد والأوحد لقيادة الحزب لولاية رابعة فالمؤتمر 11

نبيل بنعبد الله، الأمين العام لحزب التقدم والاشتراكية، معروف بخطاب سياسي كيكررو مرارا، خطاب على الديمقراطية والنفس الديمقراطي ووو، غير هو هاد الخطاب موحال واش كيطبقو فحزبو، بحيث انه باغي يشد ولاية رابعة لقيادة الحزب فالمؤتمر المقبل.
بنبعد الله سياسي كيعرف كيفاش يلعب فتيران الاحزاب والسياسة، وشفنا مواقفو فشحال من قضية وملف كان فيه شجاع وعبر ودافع ووو، وكان وفي فالتحالفات لي دار. اليوم هاد الحزب تالف معندوش نقاش داخلي حول المؤتمر حول القيادة الجديدة حول التشبيب . بحال هاد الحزب للي لعب دور مهمة فالتحالفات ديال ما بعد دستور 2011، اليوم كيعيش اسوأ فتراته، غايجلس فالمعارضة خمس سنين اضافية ومعندوش بديل للقيادة الحالية.
حزب التقدم والاتشتراكية، وللحقيقة، فعهد بنعبد الله استرجع المجد ديالو لي كان مع علي يعثة الزعيم الوطني والمؤسس للحزب، وطبعا هادشي بان فتدبير الحزب للاستحقاقات ومشاركة فحكومتي بنكيران والعثماني، والبصمة لي خلاو. حزب ناضل من أجل الحريات الفردية فالبرلمان بقوة.
المعروف ان اي حزب كان فالحكومة ورجع للمعارضة على الأقل كيبدل القيادة السياسية خصوصا الأمانة العامة للحزب، الا بنعبد الله بقا لثلاث ولايات، الحكومات تبدلو ورؤساء الاحزاب لي مشاركين فالحكومة وفالمعارضة تبدلو الا هو.
المكتب السياسي لحزب التقدم والاشتراكية ناقش في اجتماعه أمس الثلاثاء، التحضير للمؤتمر الوطني الحادي عشر للتنظيم، وكاين توجه يكون المؤتمر فنهاية السنة آواخر 2022، طبعا كاين دعم لنبيل يجيب الرابعة.