الفلفلة لي فاتت 20 درهم نوضات القربالة فالبرلمان.. وزير الفلاحة: الاثمان مرتفعة عالميا وكون ماشي المخطط الأخضر كانت غاتكون الحالة كارثية

الفلفلة شعلاتها فالبرلمان بين المعارضة والحكومة، بحيث تسببت مداخلات المعارضة ف مناوشات، بحيث هاجم رئيس فريق التقدم والاشتراكية رشيد حموني، الحكومة بسبب ارتفاع الأسعار وقال بلي الفلفلة غالية فحال يلا فوسطها الكفتة.
وإنتقد حموني بشدة المخطط الأخضر متسائلا عن نتائج ديال هاد المخطط لي وصل الأسعار لهاد المستوى.
ورد محمد الصديقي. وزير الفلاحة والصيد البحري والمياه والغابات، على انتقادات المعارضة، بالقول "كون ماشي مخطط المغرب الأخضر والعمل لي دار لكانت الحالة كارثية وخصنا نشوفو شنو طاري فالعالم".
وفسر الصديقي ارتفاع أسعار الطماطم والفلفلة رغم توفر الإنتاج بكميات مهمة بالمغرب، بالقول "الأثمان عالميا مرتفعة".
وكشف المتحدث عن فتح الحوار مع المهنيين باش يعطيو الأولية للسوق الوطنية، مؤكدا أن الإنتاج تزاد وتضاعف ديال الخضر.
وأفاد الوزير بلي الحكومة خدامة على توفير المخزون الاستراتيجي للمواد الغذائية، وتحدد الوسائل القانونية واللوجستية.