مكاين لا حقوق إنسان ولاهم يحزنون.. البوليس الإسباني سلخ حراكَة من إفريقيا جنوب الصحرا فاش دخلو لمليلية – فيديو

وثقات وسائل الإعلام الإسبانية، البارح الأربعاء، الطريقة العنيغة اللي تعامل بها البوليس الإسباني، مع حراكَة من دول إفريقيا جنوب الصحرا، اللي نقزو الكَرياج الحدودي بين جماعة "فرخانة" و مدينة مليلية المحتلة.
فيديو تداول بشكل كبير، واللي صوراتو الصحافة ديالهم، كيكشف كيفاش سلخو عناصر الأمن الإسباني، بشكل همجي، كَاع الحراكَة اللي دخلو مليلية البراح.
نشطاء فايسبوكيين، استنكرو التعامل ديال البوليس الصبليوني، مقارنة مع الأمن المغربي، اللي تعامل مع المهاجرين بطريقة احترافية، وخا كان عليه ضغط كبير وقت التدخل.
الأمن الصبليوني، حسب النشطاء، بين على أنه ماكيعرف لا احترام حقوق الإنسان ولا هم يحزنون، بحيث ماشي هادي أول مرة اللي كيتعاملو فيها بهاد الشكل الخايب مع ناس كيغامرو بحياتهم باش يوصلو لمدينة هوما أصلا محتلينها، بقوة السلاح بشهادة التاريخ.