خاص. رحلة جوية من المغرب لأوكرانيا باش تجيب الطلبة اللي حاصلين تما.. وها تفاصيلها

علمت "كَود" أن طائرة تابعة لشركة "العربية للطيارن" غادي تخرج اليوم الإثنين من مطار إبن بطوطة بمدينة طنجة في اتجاه العاصمة الأوكرانية "كييف" باش تجيب طلبة مغاربة من أوكرانيا لبلادهوم.
هاد الرحلة الجوية جات بعدما طالبت سفارة المملكة المغربية ب"كييف" من المواطنين المغاربة اللي موجودين دبا فأوكرانيا باش يخويو تما حرصا على السلامة ديالهوم، وذلك عبر الرحلات الجوية التجارية المتاحة.
ووفق ما كشفت عنه مصادر "كَود"، فإن هاد الرحلة اللي خارجة اليوم من المغرب فاتجاه "كييف" وغادي ترجع لمطار إبن بطوطة يوم غد الثلاثاء مع الثامنة صباحا، مشيرة إلى أن هاد الرحلة غادي يكونوا على متنها 170 مسافر.
وأكدت المصادر نفسها أن "العربية للطيران" غادي تنظم رحلات جوية تجارية ابتداء من بداية هاد السيمانة لأوكرانيا بهدف عودة المغاربة اللي كاينين تما حفاظا على سلامتهوم من بعد التهديديات الروسية بالهجوم على جارتها أوكرانيا.