واش مدير الوكالة الحضرية فكازا مع ناس الداخلية رافضين يطبقو القانون ويحيدو داك لبني اللي زادوه ملايرية فدار بوعزة. علاش حاگرين علي اللي زاد ياجورة وكيخافو من طاشرون سمسار كيتزعم عصيان وكيهاجم لفتيت

حسب مسؤولين من الوكالة الحضرية ل"كود" فان مديرهم لحد الان ما بغاش يطبق القانون ويريب ديور ديال ملايرية فدار بوعزة بناو ڤيلاتهم فالملك العمومي. كاين اللي زاد على دارو باكثر من مائة ميترو. حسب مصدر "كود" فمالين الديور من لملايرية لكبار اللي فيهم شي مسؤولين وشي طاشرونات وشي سماسرية ولاو رجال اعمال كبار.
القرار باش يريبو ليهم تخاد وفراس حتى رجالات الداخلية فالرباط. هاد لملايرية دارو كلشي باش ما يريبوش ليهم. لحد الان نجحو. حسب مصدر "كود" فهادو خالفو القانون وتكثلو وكيتزعمهم طاشرون جامع بين لبني والفلاحة والتسمسير وكيقول ليهم راه وزير الداخلية ما ديوهاش فيه راه عندي ما هو كبر منو.
مدير الوكالة الحضرية اللي مكلفة بالتعمير فكازا فراسها هاد الفيلم
دابا هاد المسؤولين ايلى كان شي فقير ما عندو والو وخالف القانون باش كيزيد شي جوج ياجورات كيريبو ليه. مزيان يديروها حقاش القانون هادا٬ ولكن خاصو يطبق على كلشي. على كلشي.