ها علاش ما مشاش اخنوش وعائلتو وعائلات صحابو ل"كورشوفيل"؟: الازمة والحدود مسدودة خلاتو يدير بناقص من محطة سياحية كيزورها من 20 عام

نشرت الصحافة الفرنسية بناء على قصاصة ديال وكالة الانباء الفرنسية خبار على الازمة اللي كيعرفها قطاع السياحة ففرانسا وخاصة المحطة الشهيرة "كورشوفيل". وقالت باللي عزيز اخنوش رئيس الحكومة المغربية زاد فمتاعب فنادق المحطة بالغاء الحجز.
حسب معطيات حصلات عليها "كود" فالحجز ما كانش. اللي كان هو ان اخنوش مع عائلتو وعائلات اصدقاؤو كيمشيو لهاد المحطة هادي شي 20 عام. يعني كليان ديالهم. طبعا مع كورونا كلشي تخربق. وبما انهم كليان كيكون الحجز اوطوماتيكي.
هاد العام وفق مصدر "كود"، ما كانش اخنوش غادي يمشي. من غير ان البلاد مسدودة، كاينة ازمة.
حاجة اخرى، وفق مصادر "كود"، ان هادوك 17 غرفة اللي هدرات عليها وكالة الانباء الفرنسية وكانت كتكرى فالماضي، ماشي للناس ديالو٬ بل لصحابو وعائلاتهم. اي ان كل عائلة كدير الحجز ديالها.