بالأرقام.. ها شحال ديال المغاربة لي فايتين 60 عام مبغاوش يمشيو يديرو الجرعة الثالثة ومصدر ل"گود": للي مدارش الثالثة غايجييها فصحتو

علمت "گود" أن السلطات المحلية تسارع الزمن من أجل اقناع عدد من المواطنين الذي يبلغون 60 سنة فما فوق من أجل تلقي الجرعة الثالثة المعززة، خوفا من انتكاسة صحية تزامنا مع تسجيل أول اصابة للمتحور اوميكرون بالمغرب.
وكشف مصدر بوزارة الصحة في اتصال مع "گود" أن عدد المواطنين لي خصهم ياخدو الجرعة الثالثة هو تقريبا 4 مليون مواطن لي فاتهم 6 اشهر بعد تلقيهم الجرعة الثانية. والخطير هوما لي فايتين 60 عام كيشكل عليهم اوميكرون خطر حقيقي.
وحسب معطيات "گود" لي فايتين 65 سنة ومامشاوش يديرو الجرعة الثالثة كيمثلو 27 في المائة من ديك 4 مليون، ولي بين 60 و64 عام كيمثلو 22 في المائة.
دراسات علمية بداو يخرجو كيقولو بلي ضروري من الجرعة الثالثة باش تواجه اوميكرون، بحيث الجرعة الثالثة من لقاح فايزر كيحمي تقريبا 75 في المائة من هاد المتحور، واغلب اللقاحات كتحمي من الحالات الحرجة بنسبة 80 في المائة.
دراسة بريطانية خرجات اليوم، حسب مصدر فاللجنة العلمية، كتقول بلي الحل هو الكمامة تلبس وتبدل كل 4 ساعات وغسل اليدين، اضافة الى الجرعة المعززة.
ذات المصدر قال بلي منظمة الصحة العالمية رجعات وقالت بلي أوميكرون خطير.
وكيف سبق ان نشرنا ف "گود" فراه يلا دخلات غير 5000 حالة الانعاش فهادوك الناس الكبار فالسن، كيعني العودة إلى الحجر الصحي. لانه فهاد الحالة أمام انهيار المنظومة الصحية، يوضح مصدر فاللجنة العلمية.