ها علاش خاص الحدود الجوية تحل اليوم قبل غدا. منظمة الصحة العالمية: هاد اوميكرون ماشي خطير ولارام كتموت والوضعية الوبائية عندنا مزيانة والسياحة مكرفسة

اليوم كاين اجتماع اللجنة العلمية اللي مكلفة بتتبع هاد الجايحة ديال كورونا فالمغرب. هاد اللجنة عندها مشكل كبير وهو ديك 4 المليون مغربي اللي خاصو يتلقح وما بغاش. طبعا اللجنة العلمية كتعطي التوصيات ووزارة الصحة اللي مسؤولة على تسويق عملية التلقيح واقناع هاد لمغاربة.
كاينة نقطة اساسية هو هاد المتحور الجديد ديال الفيروس واسمو اوميكرون طلع حقير ماشي خطير. المندبة كبيرة والميت فار صافي. منظمة الصحة العالمية قالت باللي اقل خطورة من ديلطا كاع وباللي اللقاحات اللي كاينة قادرة تلجمو.
المغرب كان سد حدودو وعلق الرحلات كلها بسباب هاد المتحور. دابا ما بقاش المبرر. نزيدو على هاد الشي ان الوضعية الوبائية عندنا مزيانة. البارح مثلا ما مات حتى شي حد. وعلاش هاد الزيار اللي كلفتو الاقتصادية كبيرة بزاف.
دابا فهاد الشهر ولا بقى الوضع كيف اليوم يستحيل المكتب الوطني للمطارات ولا حتى شركة الخطوط الملكية المغربية تعيش بلا سيروم الدولة. يستحيل تخلص موظفيها ففبراير ايلى ما دخلاتش الدولة.
مع هاد القطاع كاين القطاع السياحي اللي كيحتضر. كلشي خاصو الصيروم. كلشي داخل الانعاش. تزيدو تزيدو يموت ومعاه نضيعو نقط مهمة فنسبة النمو ونعطيو لسوق الشغل نسبة بطالة كبيرة.
اليوم خاص يبدا الحلان بعودة لمغاربة اللي حصلو برا. راه شوهة كبيرة اللي دارت ليهم الحكومة وخلاتهم محنسرين برا ومن بعد خاص ابداع حلول نحافظو على الوضعية الوبائية وعلى الوضعية الاقتصادية. اي خاص الماكينا تتحرك بلا ما يعمرو الصبيطارات