المخرج نبيل عيوش: مركز "نجوم" كيستقبل يوميا 1000 موهبة.. والشباب خاص يعبرو على صوتهم

كشف المخرج المغربي نبيل عيوش خلال تقديم فيلمو "علي صوتك" اللي غادي يتعرض في القاعات السينمائية انطلاقا من نهار الأربعاء، أن مركز "نجوم" كيستقبل يوميا 1000 شاب وشابة اللي كيجيو يتعلمو الشطيح والغنا والمسرح.
الفيلم ديال "علي صوتك" كيعاود قصة "أنس" رابور سابق خدم فمركز ثقافي فحي سيدي مومن فكازا، وبفضلو قدرو الشباب يتعلمو فنون الشارع اللي لقاو فيها راحتهم، ويعبرو بيها على قضاياهم.
وقال المخرج نبيل عيوش، كيفما نشرنا في مادة سابقة، أنه تعلم الإخراج في مركز كيشبه لهادا ديال سيدي مومن غير هو في فرانسا، واضاف انه المغرب فيه المواهب كثيرة خاص غير اللي يشد بيديهم.
ونبيل أكد أنه كيتسنى تجاوب الجمهور المغربي مع الفيلم خصوصا أن الانطلاقة ديالو من المغرب ومن بعد عاد غادي يتعرض في العالم.